នៅថ្ងៃសុក្រនេះ ព្យុះទីហ្វុង Shanshan បានជន់លិចតំបន់ជាច្រើនរបស់ប្រទេសជប៉ុន ពេលដែលភ្លៀងធ្លាក់ខ្លាំង ធ្វើឲ្យអាក់ខានដល់ផែនការធ្វើដំណើររបស់ភ្ញៀវទេសចរនៅក្នុងទីក្រុងតូក្យូ ។

សេវាកម្មនាវាចម្លង និងរថភ្លើង រួមទាំងរថភ្លើងល្បឿនលឿនរវាងទីក្រុងតូក្យូ និងទីក្រុងភាគកណ្តាលណាហ្គូយ៉ា ត្រូវបានផ្អាកនៅព្រឹកថ្ងៃសុក្រនេះ ធ្វើឲ្យភ្ញៀវទេសចរបរទេសជាច្រើននាក់ ជាប់ខ្លួននៅតាមមជ្ឈមណ្ឌលដឹកជញ្ជូន ។

 ក្រុមហ៊ុនអាកាសចរណ៍ រួមទាំងក្រុមហ៊ុន ANA Holdings និងក្រុមហ៊ុន Japan Airlines បានប្រកាសលុបចោលជើងហោះហើរក្នុងស្រុករាប់រយវ៉ុល និងជើងហោះហើរអន្តរជាតិមួយចំនួនទៀត ។

 យោងតាមការអះអាងរបស់ក្រុមអាជ្ញាធរ បានឲ្យដឹងថា ជាមួយកម្លាំងខ្យល់បក់ ១៨០គ.មក្នុង ១ម៉ោង ព្យុះ Shanshan បច្ចុប្បន្នកំពុងស្ថិតនៅជិតកោះ Kyushu ហើយកំពុងបោកបក់រំកិលខ្លួនឆ្ពោះទៅទិសឦសាន ។

 មនុស្ស ៦នាក់ ត្រូវបានគេរាយការណ៍ថា បានស្លាប់ និងមនុស្ស ៩២នាក់ផ្សេងទៀត រងរបួស ក្នុងឧបទ្ទេវហេតុជាប់ពាក់ព័ន្ធនឹងព្យុះ ។

 ខណៈពេលនោះដែរ ក្រុមហ៊ុន Toyota បានផ្អាកប្រតិបត្តិការនៅរោងចក្រក្នុងស្រុកទាំងអស់របស់ខ្លួន ដោយសារតែព្យុះមួយនេះ ស្របពេលដែលក្រុមហ៊ុន Nissan, Honda និងក្រុមហ៊ុនផលិតបន្ទះឈីប Renesas និងក្រុមហ៊ុន Tokyo Electron បានបញ្ឈប់បណ្តោះអាសន្នខ្សែសង្វាក់ផលិតកម្មរបស់របស់ពួកគេ នៅតាមរោងចក្រមួយចំនួន ។

 ដោយឡែក ក្រុមអាជ្ញាធរ បានចេញការប្រកាសអាសន្នកម្រិតខ្ពស់បំផុតនៅតាមតំបន់ជាច្រើន ក្នុងនោះមនុស្សជាង៥ លាននាក់ត្រូវបានជូនដំណឹងឲ្យជម្លៀសខ្លួនចេញពីផ្ទះសម្បែងរបស់ពួកគេ ៕