មន្ទីរបញ្ចកោណ និងសេវាសម្ងាត់ បាននិយាយដាច់ដោយឡែកពីគ្នា កាលពីថ្ងៃព្រហស្បតិ៍ (ទី២៩ ខែសីហា) ថា រដ្ឋមន្ត្រីការពារជាតិអាមេរិក លោក Lloyd Austin បានអនុម័តសំណើ ដើម្បីជួយផ្តល់ដល់សេវាសម្ងាត់ ជាមួយនឹងសមត្ថភាពគាំទ្រផ្នែកយោធាបន្ថែម សម្រាប់បេក្ខជនប្រធានាធិបតី និងអនុប្រធានាធិបតី ក្នុងព្រឹត្តិការណ៍បោះឆ្នោតនាពេលខាងមុខ។

អ្នកនាំពាក្យមន្ទីរបញ្ចកោណ លោកស្រី Sabrina Singh មិនបានផ្តល់ព័ត៌មានលម្អិតអំពីប្រភេទនៃការគាំទ្រដែលនឹងត្រូវបានផ្តល់នោះទេ ប៉ុន្តែបាននិយាយថា លោក Austin បានដឹកនាំទីបញ្ជាការខាងជើងរបស់សហរដ្ឋអាមេរិករៀបចំផែនការ និងផ្តល់ការគាំទ្រដល់សេវាសម្ងាត់ នៅទីតាំងផ្សេងៗ ក្នុងអំឡុងពេលបោះឆ្នោត។

អ្នកនាំពាក្យសេវាសម្ងាត់ បាននិយាយថា ក្រោយមក សេវាសម្ងាត់ បានពង្រឹងប្រតិបត្តិការការពាររបស់ខ្លួនបន្ទាប់ពីព្រឹត្តិការណ៍ជួបជុំ កាលពីថ្ងៃទី១៣ ខែកក្កដា នៅរដ្ឋ Pennsylvania របស់បេក្ខជនប្រធានាធិបតីមកពីគណបក្សសាធារណរដ្ឋ គឺអតីតប្រធានាធិបតី លោក Donald Trump ត្រូវបានបាញ់ប្រហារ តែបានរួចជីវិតពីការប៉ុនប៉ងធ្វើឃាតនោះ។

បន្ទាបពីមានហេតុការណ៍នោះ សេវាសម្ងាត់ បាននិយាយថា អង្គភាពមាន «ភាពអៀនខ្មាស» ដែលមិនអាចការពារសន្តិសុខបាន រហូតធ្វើឲ្យប្រធានរបស់ស្ថាប័ន ចុះចេញពីតំណែង៕