មន្ត្រីនគរបាលប្រហែល ៦០នាក់ បានរងរបួស ខណៈដែលនគរបាលជាតិហ្វីលីពីន (PNP) នៅតែស្ថិតនៅក្នុងបរិវេណអាណាចក្រព្រះយេស៊ូគ្រិស្ត (KJC) ក្នុងទីក្រុង Davao បន្ទាប់ពីរយៈពេលជាច្រើនថ្ងៃមិនអាចចេញដីកាចាប់ខ្លួនលោកគ្រូគង្វាល Apollo Quiboloy។

លោកស្រីវរសេនីយ៍ឯក Jean Fajardo អ្នកនាំពាក្យរបស់ PNP បានឲ្យដឹងនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ (ទី២៩ ខែសីហា)ថា៖ «សរុបប្រហែល ៦០ (មន្ត្រីនគរបាល)»។ លោកស្រីបានបន្ថែមថា៖ «ប៉ុន្តែដូចដែលយើងនិយាយអ៊ីចឹង នោះជាផ្នែកមួយនៃគ្រោះថ្នាក់ ក្នុងការបំពេញតួនាទីជានគរបាល ហើយយើងត្រូវតែកោតសរសើរនគរបាលរបស់យើង ព្រោះពួកគេពិតជាបានជ្រើសរើសវិធីអត់ឱនជាអតិបរមា»។

នគរបាលគិតថា លោក Quiboloy ដែលប្រកាសខ្លួនឯងជា «ម្ចាស់សកលលោក» និងដែលតាំងខ្លួនជា «កូនព្រះ» កំពុងលាក់ខ្លួននៅក្នុងលេណដ្ឋានមួយ នៅឯបរិវេណធំទូលាយដែលជាកម្មសិទ្ធិរបស់ព្រះវិហារ KJC របស់លោក នៅភាគខាងត្បូងទីក្រុង Davao ។ ហើយនៅពេលមន្ត្រីនគរបាល ព្យាយាមចូលទៅក្នុងបរិវេណនោះ ក៏ត្រូវប្រឈមជាមួយនឹងការរារាំងពីអ្នកគោរពបូជាលោក Quiboloy។

គ្រូគង្វាលដ៏មានឥទ្ធិពលរូបនេះ ត្រូវបានគេតាមចាប់ខ្លួន ជុំវិញការចោទប្រកាន់ពីបទរំលោភលើកុមារ និងផ្លូវភេទ ហើយនិងការចោទប្រកាន់ពាក់ព័ន្ធនឹងការជួញដូរមនុស្ស។ តែរូបលោកបដិសេធមិនបានធ្វើខុសអ្វីទាំងអស់៕