សេវាកម្មពន្លត់អគ្គិភ័យក្រូអាត បាននិយាយថា ក្រុមភ្នាក់ងារពន្លត់អគ្គិភ័យ ៣០០នាក់ បានព្យាយាមពន្លត់ភ្លើងឆេះព្រៃនៅជិតតំបន់ទេសចរណ៍ដ៏ទាក់ទាញក្នុងទីក្រុង Split ។

រដ្ឋធានី Split ដែលជាទីក្រុងធំបំផុតទី ២របស់ក្រូអាត បានព្យាយាមពន្លត់ភ្លើងឆេះព្រៃ ចាប់តាំងពីថ្ងៃចន្ទរហូតមក ដែលបានឆាបឆេះដីព្រៃអស់ប្រហែល ៧០០ហិចតា ។

សមាគមពន្លត់អគ្គិភ័យក្រូអាត និយាយថា ភ្លើងឆេះព្រៃដែលបានចាប់ផ្តើមនៅភ្នំ Žrnovnica ក្រោយរន្ទះបាញ់កាលពីថ្ងៃអាទិត្យ ត្រូវគ្រប់គ្រងបាន ប៉ុន្តែអណ្តាតភ្លើងបានឆាបឆេះម្តងទៀតកាលពីយប់ថ្ងៃពុធ ក្រោយខ្យល់បក់ខ្លាំង ។

យន្តហោះពន្លត់អគ្គិភ័យ Canadair និងរថយន្តពន្លត់អគ្គិភ័យរាប់សិបគ្រឿង ត្រូវបានប្រើប្រាស់ដើម្បីពន្លត់ភ្លើងឆេះព្រៃ ដែលពួកគេគ្រប់គ្រងបានកាលពីថ្ងៃព្រហស្បតិ៍ ។

ក្រុមអ្នកវិទ្យាសាស្រ្ត និយាយថា ស្ថានភាពខ្យល់ស្ងួត និងសីតុណ្ហភាពហក់ឡើងខ្ពស់លើសកម្រិតមធ្យម បណ្តាលឲ្យកើតមានភ្លើងឆេះព្រៃញឹកញាប់នៅតាមតំបន់ជាច្រើនរបស់អឺរ៉ុប ៕