គណៈកម្មាធិការប្រឆាំងអំពើពុករលួយរបស់ប្រទេសថៃ នៅថ្ងៃសុក្រ (ទី៣០ ខែសីហា) នេះ បានប្រាប់ឲ្យដឹងថា ខ្លួនបានបើកការស៊ើបអង្កេតលើសមាជិកចំនួន ៤៤រូបរបស់គណបក្សបោះជំហានទៅមុខ (Move Forward) ដែលត្រូវបានរំលាយ ក្នុងនោះ ២៥នាក់ គឺជាសមាជិកសភាបច្ចុប្បន្ន ដោយការចាប់ផ្ដើមនូវដំណើរការនេះ ពាក់ព័ន្ធនឹងការគាំទ្រដល់សេចក្ដីស្នើច្បាប់ដែលស្វែងរកការកែប្រែច្បាប់ប្រមាថព្រះមហាក្សត្រ។

ការលើកឡើងពីការស៊ើបអង្កេតនេះកើតឡើងមិនដល់មួយខែផងបន្ទាប់ពីតុលាការ បានសម្រេចឲ្យរំលាយគណបក្សបោះជំហានទៅមុខ ជុំវិញការសន្យារបស់គណបក្សនេះ អំឡុងពេលធ្វើយុទ្ធនាការបោះឆ្នោត ដែលថា នឹងស្វែងរកការធ្វើវិសោធនកម្មច្បាប់ប្រមាថព្រះមហាក្សត្រ។ ក្រោយពីត្រូវបានរំលាយ ក្រុមនេះបានរៀបចំបង្កើតគណបក្សថ្មីមួយទៀត គឺគណបក្សប្រជាជន ហើយនៅតែជាគណបក្សធំជាងគេក្នុងសភា។

គួរបញ្ជាក់ថា ច្បាប់ប្រមាថព្រះមហាក្សត្រ ការពារព្រះមហាក្សត្រមិនឲ្យមានការរិះគន់ ហើយផ្តន្ទាទោសដាក់ពន្ធនាគាររហូតដល់ ១៥ឆ្នាំ ចំពោះអ្នករំលោភបំពាន។ អ្នកប្រឆាំងច្បាប់នេះ និយាយថា វាត្រូវបានប្រើប្រាស់ ដើម្បីរារាំងអ្នកមានគំនិតផ្ទុយ។

លោក Sarote Phuengrampan អគ្គលេខាធិការរងគណៈកម្មាធិការជាតិប្រឆាំងអំពើពុករលួយ បានប្រាប់សារព័ត៌មាន Reuters ថា៖ «យើងបានចាប់ផ្តើមហៅបុគ្គលពាក់ព័ន្ធឲ្យមកស្ដាប់ព័ត៌មានលម្អិត» ហើយលោកបានបន្ថែមថា ក្រុមស៊ើបអង្កេតត្រូវបានបង្កើតឡើង។ តែលោកបានបញ្ជាក់ថា៖ «យើងមិនបានហៅទាំង ៤៤នាក់នោះទេ គឺមានតែមួយចំនួនប៉ុណ្ណោះ។ ជំហាននេះ គឺដើម្បីប្រមូលភស្តុតាង ប៉ុន្តែមិនទាន់មាននរណាម្នាក់ត្រូវបានចោទប្រកាន់នៅឡើយទេ»។

តាមនីតិវិធីរបស់គណៈកម្មាធិការនេះ ប្រសិនបើក្រុមប្រឹក្សារកឃើញភស្តុតាងគ្រប់គ្រាន់ពីការមានអាកប្បកិរិយាគ្មានសីលធម៌ នោះនឹងមានការចោទប្រកាន់ ចំពោះបុគ្គលទាំងនោះដែលអាចការពារខ្លួន មុនពេលមានការសម្រេចថា តើត្រូវកាត់ទោសពួកគេ នៅតុលាការដែរ ឬយ៉ាងណា៕