កងទ័ពអ៊ីស្រាអែល បាននិយាយកាលពីថ្ងៃសុក្រថា ជំនួយមនុស្សធម៌ ដែលនឹងត្រូវបញ្ជូនទៅកាន់តំបន់ហ្កាហ្សា បានមកដល់ប្រទេសអ៊ីស្រាអែល កាលពីថ្ងៃព្រហស្បតិ៍ តាមនាវាដឹកទំនិញរបស់សហរដ្ឋអាមេរិក។

កងទ័ព បាននិយាយនៅក្នុងសេចក្តីថ្លែងការណ៍ថា ជំនួយជាង៣.៥០០ បាឡែត មកពីអង្គការផ្ទះបាយកណ្តាលពិភពលោក(World Central Kitchen) អង្គការUSAID និងអង្គការជំនួយជនភៀសខ្លួនតំបន់ដើមបូព៌ាទ្វីបអាមេរិក(American Near East Refugee Aid) ត្រូវបានដឹកជញ្ជូនតាមនាវា Cape Trinity របស់សហរដ្ឋអាមេរិក តាមច្រករបៀងសមុទ្រ ពីប្រទេសស៊ីប។

កងទ័ពអ៊ីស្រាអែល បានបញ្ចេញវីដេអូនៃជំនួយ ដែលចូលទៅដល់កំពង់ផែ Ashdod ក្នុងប្រទេសអ៊ីស្រាអែល និងបាននិយាយថា ជំនួយ ចាំបាច់ត្រូវឆ្លងកាត់ការត្រួតពិនិត្យសន្តិសុខ មុនពេលត្រូវបានអនុញ្ញាតឱ្យចូលទៅក្នុងតំបន់ហ្កាហ្សា។

សារព័ត៌មានរ៉យទ័រ អាចផ្ទៀងផ្ទាត់ទីតាំងដោយឯករាជ្យពីរចនាសម្ព័ន្ធកំពង់ផែ ដែលត្រូវគ្នាទៅនឹងការ អះអាងកាលពីពេលមុននៅកំពង់ផែ Ashdod ។