អតីតអភិបាលក្រុងតៃប៉ិដែលដឹកនាំគណបក្សប្រឆាំងតូចមួយ ត្រូវបានចាប់ខ្លួន នៅព្រឹកថ្ងៃសៅរ៍ (ទី៣១ ខែសីហា) ដែលជាផ្នែកមួយនៃការស៊ើបអង្កេតអំពើពុករលួយនៃការអភិវឌ្ឍអចលនទ្រព្យដ៏ធំមួយ នៅក្នុងទីក្រុងរបស់កោះតៃវ៉ាន់មួយនេះ។

លោក Ko Wen-je ជាអភិបាលក្រុងពីឆ្នាំ២០១៤ ដល់ឆ្នាំ២០២២ និងដែលបានស្ថិតនៅលំដាប់ទី៣ ក្នុងការបោះឆ្នោតជ្រើសរើសមេដឹកនាំ កាលពីខែមករា ត្រូវបានចាប់ខ្លួន បន្ទាប់ពីក្រុមអ្នកស៊ើបអង្កេតបានឆ្មក់ចូលផ្ទះ និងគណបក្សរបស់លោក កាលពីថ្ងៃសុក្រ ហើយបានសាកសួររូបលោកជាច្រើនម៉ោង។

លោក Ko បានបដិសេធមិនបានធ្វើខុស ក្នុងសំណុំរឿងនេះ ដែលពាក់ព័ន្ធនឹងការអនុម័ត សម្រាប់គម្រោងអចលនទ្រព្យ នៅពេលលោកកាន់តំណែងអភិបាលក្រុង ដោយលោកបានប្រាប់អ្នកសារព័ត៌មាននៅថ្ងៃសុក្រនោះថា៖ «ខ្ញុំដឹងថា ខ្ញុំមិនមានបញ្ហាអ្វីទេ»។

នៅក្នុងសេចក្តីថ្លែងការណ៍ នាថ្ងៃសៅរ៍នេះ គណបក្ស TPP បានលើកឡើងថា ខ្លួន «អំពាវនាវឲ្យតុលាការពិនិត្យមើលដោយប្រុងប្រយ័ត្ននូវភាពស្របច្បាប់នូវនីតិវិធីនៃការចាប់ខ្លួន ក្នុងអំឡុងពេលដំណើរការសវនាការ និងផ្តល់យុត្តិធម៌ដល់លោកប្រធាន Ko Wen-je ដូចដែលលោកសមនឹងទទួលបាន»។

យ៉ាងណាក្ដី លោក Ko និងគណបក្ស TPP ក៏បានទទួលស្គាល់ផងដែរថា មូលនិធិយុទ្ធនាការ ក្នុងអំឡុងពេលធ្វើយុទ្ធនាការបោះឆ្នោតជ្រើសរើសមេដឹកនាំ ត្រូវបានរាយការណ៍ខុស។ លោក Ko បាននិយាយនៅសប្តាហ៍នេះថា លោកនឹងលាលែងពីតំណែងប្រធានគណបក្សជាបណ្ដោះអាសន្ន ខណៈដែលករណីនេះកំពុងត្រូវបានស៊ើបអង្កេត ហើយបានសុំទោសអ្នកគាំទ្រគណបក្សរបស់លោក៕