អាជ្ញាធរក្នុងប្រទេសបង់ក្លាដែស កំពុងត្រៀមលក្ខណៈទប់ទល់នឹងការរីករាលដាលនៃជំងឺឆ្លងតាមទឹក និងធ្វើការឥតសម្រាក ដើម្បីផ្ដល់ទឹកបរិភោគដល់ប្រជាជន បន្ទាប់ពីមាននូវគ្រោះទឹកជំនន់ដ៏មហន្តរាយ កាលពីសប្តាហ៍មុន ដែលបានបណ្តាលឲ្យមនុស្សយ៉ាងហោចណាស់ ៥៤នាក់ ស្លាប់ និងរាប់លាននាក់ទៀត ជាប់នឹងកន្លែងទៅណាមិនរួច។

ក្នុងខណៈពេលដែលទឹកជំនន់ស្រកយឺតៗ មនុស្សជាច្រើននៅតែមិនអាចធ្វើដំណើរទៅណាបាន ហើយត្រូវការជាបន្ទាន់នូវអាហារ ទឹកស្អាត ឱសថ និងសម្លៀកបំពាក់ស្ងួត ជាពិសេសនៅតំបន់ដាច់ស្រយាល ដែលផ្លូវមិនអាចធ្វើដំណើរបាន បានក្លាយជាឧបសគ្គដល់កិច្ចប្រឹងប្រែងជួយសង្គ្រោះ និងផ្ដល់ជំនួយសង្គ្រោះ។

នាយកដ្ឋានឧតុនិយមបង់ក្លាដែស បានឲ្យដឹងថា ស្ថានភាពទឹកជំនន់អាចបន្តមានដដែល ប្រសិនបើភ្លៀងមូសុង នៅតែបន្តធ្លាក់ឥតដាច់ ខណៈដែលកម្រិតទឹកស្រកចុះបន្តិចយឺតៗ។

អាជ្ញាធរបាននិយាយថា មនុស្សប្រហែល ៤៧០.០០០នាក់ បានជ្រកកោននៅក្នុងជម្រកបណ្ដោះអាសន្នចំនួន ៣.៣០០កន្លែង នៅទូទាំងតំបន់ចំនួន១១ ដែលរងគ្រោះដោយទឹកជំនន់ ជាកន្លែងដែលក្រុមគ្រូពេទ្យប្រហែល ៦០០នាក់ កំពុងជួយផ្តល់ការព្យាបាល ដោយមានកងទ័ព កងទ័ពអាកាស កងទ័ពជើងទឹក និងឆ្មាំព្រំដែនជួយក្នុងប្រតិបត្តិការជួយសង្គ្រោះនេះ។

មន្ត្រីក្រសួងគ្រប់គ្រងគ្រោះមហន្តរាយ បានព្រមានថា នៅពេលដែលទឹកជំនន់ស្រកចុះ វាមានហានិភ័យពីជំងឺរាតត្បាត ដោយបន្ថែមថា ការផ្ទុះឡើងនូវជំងឺឆ្លងតាមទឹកទំនងជាកើតមាន ប្រសិនបើទឹកស្អាតមិនត្រូវបានផ្តល់ឲ្យបានឆាប់ៗទេនោះ៕