ប្រទេសចិន និងហ្វីលីពីន បានចោទប្រកាន់គ្នាទៅវិញទៅមក ជុំវិញឧបទ្ទវហេតុបុកនាវារបស់ពួកគេ ក្នុងតំបន់មានជម្លោះ នៅសមុទ្រចិនខាងត្បូង នាថ្ងៃសៅរ៍ (ទី៣១ ខែសីហា) នេះ ដែលជាការប៉ះទង្គិចគ្នាចុងក្រោយបំផុតនៅក្នុងផ្លូវទឹកដ៏សំខាន់មួយនេះ។

ឆ្មាំល្បាតឆ្នេររបស់ប្រទេសចិន បាននិយាយថា នាវាហ្វីលីពីន ១គ្រឿង ដែល «ត្រូវបានចតដោយខុសច្បាប់» នៅតំបន់ថ្មប៉ប្រះទឹក Sabina Shoal បានលើកយុថ្កា និង «បុកនាវាចិនដោយចេតនា» ខណៈដែលឆ្មាំល្បាតឆ្នេរហ្វីលីពីន (PCG) បាននិយាយថា នាវាចិន «មានចេតនាបុកនាវារបស់ខ្លួន ១គ្រឿង»។

គួរបញ្ជាក់ថា ទីក្រុងប៉េកាំងទាមទារស្ទើរតែទាំងស្រុងនូវផ្នែកនៃសមុទ្រចិនខាងត្បូង ក្នុងនោះរួមទាំងចំណែក ដែលត្រូវបានទាមទារដោយហ្វីលីពីន ប្រ៊ុយណេ ម៉ាឡេស៊ី កោះតៃវ៉ាន់ និងវៀតណាមផងដែរ។ ផ្នែកនៃផ្លូវទឹក ដែលមានតម្លៃពាណិជ្ជកម្មឆ្លងកាត់តម្លៃ ៣សែនកោដិដុល្លារ ជារៀងរាល់ឆ្នាំនេះ ត្រូវបានគេជឿថាសម្បូរទៅដោយប្រេង និងឧស្ម័នធម្មជាតិ ក៏ដូចជាកន្លែងផ្គត់ផ្គង់ត្រីផងដែរ។

ក្នុងសេចក្តីថ្លែងការណ៍មួយ លោក Liu Dejun អ្នកនាំពាក្យឆ្មាំល្បាតឆ្នេររបស់ចិន បានអំពាវនាវដល់ហ្វីលីពីនឲ្យដកចេញជាបន្ទាន់ពីតំបន់ថ្មប៉ប្រះទឹក។ លោក Liu បាននិយាយថា៖ «ឆ្មាំឆ្នេរសមុទ្រចិន នឹងចាត់វិធានការចាំបាច់ ដើម្បីរារាំងរាល់សកម្មភាពបង្កហេតុ ការបង្កបញ្ហា និងការរំលោភបំពាន ហើយការពារយ៉ាងម៉ឺងម៉ាត់នូវអធិបតេយ្យភាពដែនដី និងសិទ្ធិ ហើយនិងផលប្រយោជន៍ដែនសមុទ្ររបស់ប្រទេស»។

ចំណែកអ្នកនាំពាក្យឆ្មាំល្បាតឆ្នេរហ្វីលីពីន លោកឧត្តមនាវីត្រី Jay Tarriela បានប្រាប់អ្នកសារព័ត៌មានថា ឆ្មាំសមុទ្រចិនមិនបានអើពើនឹងបទប្បញ្ញត្តិទប់ស្កាត់ការបុកទង្គិចគ្នា ហើយបានធ្វើសកម្មភាពដ៏គ្រោះថ្នាក់ ដែលបណ្តាលឲ្យមានការខូចខាត ប៉ុន្តែបាននិយាយថា មិនមានអ្នករងរបួសនោះទេ នៅក្នុងហេតុការណ៍នោះ៕