សំឡេងស៊ីរ៉ែនបានបន្លឺឡើងយ់ាងកងរំពង កាលពីយប់ថ្ងៃសុក្រ (ទី៣០ ខែសីហា) នៅតំបន់ជាច្រើន ជុំវិញទីក្រុង Kiryat Shmona ខណៈដែលគ្រាប់រ៉ូកែតជាច្រើនត្រូវបានបាញ់ស្រោចដូចភ្លៀងសំដៅឆ្ពោះទៅភាគខាងជើងប្រទេសអ៊ីស្រាអែល។ ហើយយោធាអ៊ីស្រាអែលបានប្រាប់ថា គ្រាប់រ៉ូកែតនេះត្រូវបានបាញ់ចេញពីប្រទេសលីបង់។

យោងតាមកងទ័ពរបស់អ៊ីស្រាអែល បានឲ្យដឹងថា គ្រាប់ផ្លោងមួយចំនួនត្រូវបានស្ទាក់ចាប់ ខណៈគ្រាប់ផ្សេងទៀត បានធ្លាក់នៅតំបន់ទីវាល ដែលបណ្តាលឲ្យមានជាអគ្គិភ័យឆាបឆេះឡើង។ ជាការឆ្លើយតបទៅនឹងការវាយប្រហារនេះ យោធាបានប្រាប់ថា កម្លាំងទ័ពអាកាសរបស់ខ្លួន បានវាយប្រហារទីតាំងជាច្រើនរបស់ក្រុមហេសបូឡា នៅភាគខាងត្បូងលីបង់។

គួរបញ្ជាក់ថា នាពេលនេះ ការភ័យខ្លាចពីការមានសង្រ្គាមទ្រង់ទ្រាយធំ នៅតំបន់មជ្ឈិមបូព៌ា កំពុងកើនឡើងកាន់តែខ្លាំងឡើងៗ នៅពេលដែលការបាញ់ប្រហារតគ្នាទៅវិញទៅមក រវាងក្រុមហេសបូឡា និងអ៊ីស្រាអែល នៅតែបន្តមានបែបនេះ៕