លោកប្រធានាធិបតីអ៊ុយក្រែន Volodymyr Zelenskyy បានបង្កើនសម្ពាធលើសហរដ្ឋអាមេរិក ដើម្បីអនុញ្ញាតឱ្យទីក្រុង Kyiv វាយប្រហារកាន់តែជ្រៅទៅក្នុងទឹកដីរុស្ស៊ី បន្ទាប់ពីក្រុមអ្នកតំណាងរបស់លោកបានជួបជាមួយមន្ត្រីជាន់ខ្ពស់អាមេរិកក្នុងទីក្រុងវ៉ាស៊ីនតោន កាលពីថ្ងៃសៅរ៍ ៣១ សីហា។  

ទីក្រុងវ៉ាស៊ីនតោន បានផ្តល់ជំនួយយោធាជាង៥០ ពាន់លានដុល្លារដល់អ៊ុយក្រែនចាប់តាំងពីឆ្នាំ ២០២២ មក ប៉ុន្តែបានកំណត់ការប្រើប្រាស់អាវុធរបស់ខ្លួនចំពោះទឹកដីអ៊ុយក្រែន និងប្រតិបត្តិការការពារឆ្លងព្រំដែនដោយមិនឲ្យមានការវាយប្រហារចូលជ្រៅក្នុដីរុស្ស៊ី ព្រោះបារម្ភខ្លាចមានការសងសឹកពីរុស្ស៊ីធ្វើឲ្យសង្រ្គាមរីកកាន់តែធំ។ 

លោក Zelenskyy បាននិយាយនៅក្នុងសុន្ទរកថាតាមវីដេអូពេលយប់របស់លោកថា ការបោសសម្អាតផ្ទៃមេឃអ៊ុយក្រែនកុំឲ្យមានវត្តមានយន្តហោះទម្លាក់គ្រាប់បែករុស្ស៊ី គឺជាជំហានដ៏រឹងមាំមួយដើម្បីបង្ខំឱ្យរុស្ស៊ី ស្វែងរកការបញ្ចប់សង្រ្គាម និងងាកទៅរកការបង្កើតសន្តិភាព ។  

ដោយអំពាវនាវទៅកាន់សហរដ្ឋអាមេរិក អង់គ្លេស បារាំង និងអាល្លឺម៉ង់ លោកបាននិយាយថា យើងត្រូវការសមត្ថភាពដើម្បីការពារអ៊ុយក្រែននិងប្រជាជន យ៉ាងពិតប្រាកដ និងពេញលេញ។

យើងត្រូវការទាំងការអនុញ្ញាតសម្រាប់សមត្ថភាពអាវុធរយៈចម្ងាយឆ្ងាយ និងគ្រាប់ផ្លោង ព្រមទាំងមីស៊ីលរយៈចម្ងាយឆ្ងាយរបស់អ្នក៕