មនុស្សយ៉ាងហោចណាស់៦នាក់បានស្លាប់ ខណៈព្យុះទីហ្វុង សានសាន (Shanshan) បានបោកបក់ឆ្ពោះទៅភាគខាងកើតប្រទេសជប៉ុនកាលពីថ្ងៃសៅរ៍ ដោយបានបក់បោកលើតំបន់ធំៗ នាំមកជាមួយនូវភ្លៀងធ្លាក់ខ្លាំង បង្កឱ្យមានបំណាក់ដី និងការព្រមានអំពីទឹកជំនន់ចម្ងាយរាប់រយគីឡូម៉ែត្រពីចំណុចកណ្តាលរបស់ព្យុះនេះ។ 

ទីភ្នាក់ងារគ្រប់គ្រងគ្រោះមហន្តរាយ និងអគ្គិភ័យរបស់ប្រទេសជប៉ុនបាននិយាយថា មនុស្សម្នាក់បានបាត់ខ្លួន និងជាង ១០០នាក់បានរងរបួស។ យោងតាមក្រុមហ៊ុនថាមពល ឃ្យូស៊ូ (Kyushu) បានឱ្យដឹងថា លំនៅឋានជាង៣៥.០០០ខ្នងគ្មានអគ្គិសនីប្រើប្រាស់នៅក្នុងខេត្ត កាហ្គោស៊ីម៉ា (Kagoshima )ភាគខាងត្បូងកោះ ឃ្យូស៊ូ(Kyushu) ។    

ព្យុះទីហ្វុងសានសាន ដែលស្ថិតនៅកណ្តាលមហាសមុទ្រប៉ាស៊ីហ្វិកចម្ងាយប្រហែល ៤៨០ គីឡូម៉ែត្រ ភាគនិរតីនៃទីក្រុងតូក្យូនៅម៉ោង១២:៥០នាទីរសៀល បានបង្កឲ្យមានភ្លៀងធ្លាក់ខ្លាំងរហូតដល់ខេត្តភាគខាងជើងចុងផុតនៃកោះហុកកៃដូ ទោះត្រូវបានបន្ទាបកម្រិតទៅជាប្រភេទព្យុះត្រូពិកកាលពីថ្ងៃសុក្រក៏ដោយ។ ខ្យល់បានបក់បោករហូតដល់ ២៥ ម៉ែត្រក្នុងមួយវិនាទី ឬ ៩០ គីឡូម៉ែត្រក្នុងមួយម៉ោង ។    

ក្រុមអាជ្ញាធរបានចេញការព្រមានអំពីទឹកជំនន់ និងបំណាក់ដីទូទាំងប្រទេសចាប់តាំងពីការមកដល់របស់ព្យុះនេះ ដែលបង្ខំឲ្យបញ្ឈប់សេវាកម្មផ្លូវអាកាស និងផ្លូវដែក និងការបិទរោងចក្រ៕