ម៉ូតូទឹក៖ ម្ចាស់មេដាយមាសកីឡាអាស៊ី សាលី អ៊ូមើត បានខកខានចូលរួមការប្រកួតកីឡាម៉ូតូទឹកអន្ដរជាតិនៅអឺរ៉ុបមួយទៀតហើយគឺកម្មវិធីប្រកួត Regione Sardegna Grand Prix of Italy 2021 នៅប្រទេសអ៊ីតាលីដោយសារបញ្ហាកូវីដ-១៩ ធ្វើឲ្យយឺតយ៉ាវក្នុងការស្នើសុំទិដ្ឋាការ។
យ៉ាងណាមិញរូបគេ និងកីឡាករម៉ូតូទឹកជម្រើសជាតិកម្ពុជា ២រូបទៀតបានប្ដូរទិសដៅទៅបោះជុំរុំហ្វឹកហាត់នៅប្រទេសអូទ្រីសវិញម្ដង ដោយគ្រោងចេញដំណើរល្ងាចថ្ងៃទី១៨ ខែកញ្ញាស្អែកនេះដើម្បីពង្រឹងសមត្ថភាពត្រៀមការប្រកួតអន្ដរជាតិនានានា។ សាលី អ៊ូមើត បានឲ្យដឹងថា ការប្រកួត Regione Sardegna Grand Prix of Italy 2021 នឹងចាប់ផ្ដើមការប្រកួតនៅថ្ងៃទី១៧ ដល់ថ្ងៃទី១៩ ខែកញ្ញានេះហើយ បន្ទាប់ពីមានការលើកពេលមកពីដើមខែកញ្ញាកន្លងទៅ។ ដើម្បីចង់ចូលរួមព្រឹត្តិការណ៍នេះ ខ្លួននឹងកីឡាករជម្រើសជាតិ ៤រូបទៀតបានធ្វើដំណើរពីប្រទេសថៃមកកម្ពុជាកាលពីពាក់កណ្ដាលខែកក្កដាកន្លងទៅ ដើម្បីបន្ដសុពលភាពលិខិតឆ្លងដែន និងស្នើសុំទិដ្ឋាការទៅអឺរ៉ុប តែដោយសារបញ្ហាកូវីដ-១៩ បានធ្វើដំណើរការស្នើសុំទិដ្ឋាការមានការយឺតយ៉ាវ ពោលគឺពួកគេទើបទទួលបានការយល់ព្រមផ្ដល់ទិដ្ឋាការកាលពីថ្ងៃអង្គារកន្លងទៅ។ ប៉ុន្ដែដោយសារកៀកនឹងថ្ងៃប្រកួត ខណៈមុនចេញដំណើរ ពួកគេត្រូវគោរពវិធានាការសុខាភិបាលដោយការធ្វើតេស្ដរកជំងឺកូវីដ-១៩ ផងនោះ សាលី អ៊ូមើត មិនអាចចេញទៅដំណើរចូលរួមការប្រកួតទាន់ពេលនោះទេ។ នេះបើតាមការបញ្ជាក់របស់សាមីខ្លួន ដ្បិតរូបគេបានសម្ដែងការសោកស្ដាយ ព្រោះកាលពីពេលកន្លង វីរកីឡាករម៉ូតូទឹកកម្ពុជារូបនេះក៏ទើបតែខកខានចូលរួមការប្រកួតកីឡាម៉ូតូទឹកពិភពលោក Jet Ski World Series 2021-2022 (ជុំទី១) នៅប្រទេសប៉ូឡូញផងដែរ។
យ៉ាងណាមិញ សាលី អ៊ូមើត បានបញ្ជាក់ថា ខ្លួននឹងកីឡាករ ២រូបទៀតរួមមានកីឡាករ មីន អូស្មាន និង កៃ វ៉ាន់ស៊ីដែន នឹងត្រូវចាកចេញពីកម្ពុជាទៅអឺរ៉ុបនៅចុងសប្ដាហ៍នេះ ដើម្បីធ្វើការបោះជុំរុំហ្វឹកហាត់រយៈពេល ១ខែនៅប្រទេសអូទ្រីសដើម្បីពង្រឹងសមត្ថភាពត្រៀមការប្រកួតអន្ដរជាតិនានា ក៏ដូចជាបន្ស៊ាំនឹងម៉ូតូទឹកថ្មីរបស់ខ្លួនដែលមានតម្លៃជាង ៨ម៉ឺនដុល្លារកំពុងស្ថិតនៅប្រទេសអូទ្រីសស្រាប់។ អ៊ូមើត បានបញ្ជាក់ថា គោលដៅដែលសំខាន់ក្នុងការបោះជុំរុំហាត់នៅអឺរ៉ុបនេះ គឺដើម្បីត្រៀមស៊ីហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា, រូបភាពពាក់ព័ន្ធ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
