មន្ត្រីសុខាភិបាលបាននិយាយថា យុទ្ធនាការចាក់វ៉ាក់សាំងបង្ការជំងឺស្វិតដៃជើង របស់ក្រុមទីភ្នាក់ងារអង្គការសហប្រជាជាតិបានចាប់ផ្តើមនៅដែនដីហ្កាហ្សា កាលពីថ្ងៃសៅរ៍ ៣១ សីហា ខណៈបុគ្គលិកជំនួយបាននិយាយថា ដំណើរការទ្រង់ទ្រាយធំបានចាប់ផ្តើមនៅថ្ងៃអាទិត្យនេះ ស្របពេលជាមួយនឹងការផ្អាកប្រយុទ្ធសម្រាប់មនុស្សធម៌ ដែលបានព្រមព្រៀងដោយអ៊ីស្រាអែល និងក្រុមហាម៉ាស។

ក្រុមគ្រូពេទ្យបាននិយាយថា យុទ្ធនាការចាក់វ៉ាក់សាំងបង្ការកំពុងដំណើរ ខណៈការវាយប្រហារតាមអាកាសរបស់អ៊ីស្រាអែលបានសម្លាប់មនុស្សយ៉ាងហោចណាស់៤៩នាក់។  

ការជំរុញការចាក់ថ្នាំបង្ការត្រូវបានប្រកាសបន្ទាប់ពីដែនដីហ្កាហ្សាបានកត់ត្រាករណីជំងឺស្វិតដៃជើងលើកដំបូងរបស់ខ្លួន ក្នុងរយៈពេល២៥ឆ្នាំ មិនធ្លាប់មានកាលពីដើមខែនេះ។

លោកម៉ូហ្សាអាបេដ ( Moussa Abed) នាយកផ្នែកថែទាំសុខភាពបឋមនៅក្រសួងសុខាភិបាលក្នុងតំបន់ហ្កាហ្សា គ្រប់គ្រងដោយក្រុមហាម៉ាស បានប្រាប់សារព័ត៌មាន AFP កាលពីថ្ងៃសៅរ៍ថា មន្ត្រីសុខាភិបាលក្នុងតំបន់រួមជាមួយអង្គការសហប្រជាជាតិ និងអង្គការក្រៅរដ្ឋាភិបាល កំពុងចាប់ផ្តើមយុទ្ធនាការចាក់វ៉ាក់សាំងបង្ការជំងឺស្វិតដៃជើងនៅថ្ងៃនេះ។

ចំនួនកុមារដែលពុំបានបញ្ជាក់ច្បាស់លាស់ បានទទួលដូសវ៉ាក់សាំងលើកទីមួយរួចហើយ ដែលពួកគេនឹងត្រូវចាក់ចំនួនពីរលើក និងត្រូវបានគ្រប់គ្រងដោយផ្ទាល់នៅមន្ទីរពេទ្យ Nasser ក្នុងទីក្រុង Khan Yunis ភាគខាងត្បូង៕