បាល់ទាត់៖ ជំនួបជើងទី២ នៃលីគកំពូលកម្ពុជារវាងក្រុមអគ្គិសនីកម្ពុជា និងក្រុមសូលទីឡូអង្គរ ដែលគ្រោងជួបគ្នាក្នុងវគ្គរក្សាកៅអីសុវត្ថិភាពពីការកាត់ចេញនៅថ្ងៃទី១៨ ខែកញ្ញា ឆ្នាំ២០២១ ចុងសប្ដាហ៍នេះត្រូវបានលើកពេលជាបណ្ដោះអាសន្នហើយ បន្ទាប់ពីរកឃើញមន្ដ្រីក្លិបសូលទីឡូអង្គរ ២នាក់មានវិជ្ជមានកូវីដ-១៩។ នេះបើតាមការបញ្ជាក់លើប្រព័ន្ធផ្សព្វផ្សាយរបស់គណៈកម្មការប្រកួតបាល់ទាត់ជាតិកម្ពុជា-CNCC នៅរសៀលថ្ងៃព្រហស្បត្តិ៍នេះ។
តាមការជូនដំណឹងរបស់ CNCC បានឲ្យដឹងថា តាមនិតិវិធីវិធានសុត្ថិភាពក្លិបទាំងអស់តម្រូវត្រូវធ្វើតេស្តរហ័សរាល់មុនគ្រប់ការប្រកួត ហើយកាលពីថ្ងៃ១៥ ខែកញ្ញាម្សិលមិញ ពេលក្លិបសូលទីឡូអង្គរធ្វើតេស្តរកឃើញមន្ត្រី ២រូបមានលទ្ធផលវិជ្ជមានជំងឺកូវីដ-១៩។ បន្ទាប់មកសំណាករបស់មន្ត្រីទាំងពីរត្រូវបានបន្តយកទៅធ្វើតេស្ត PCR។ ដូច្នេះមន្ត្រី និងកីឡាករដ៏ទៃទៀតដែលអវិជ្ជមាន និងការប្រកួតថ្ងៃទី១៨ ខែកញ្ញាចុងសប្ដាហ៍នេះត្រូវរង់ចាំលទ្ធផលវិភាគបញ្ជាក់របស់មន្ត្រីពីរសិន។ យ៉ាងណាមិញតាមការបញ្ជាក់របស់គណៈកម្មការប្រកួតបាល់ទាត់ជាតិកម្ពុជា ការប្រកួតនេះត្រូវបានលើកពេលជាបណ្ដោះអាសន្ន ដោយការផ្លាសប្ដូរកាលបរិច្ឆេទប្រកួតថ្មីដែលនឹងជម្រាបជូននាពេលក្រោយ។
គួរដឹងថា អគ្គិសនីកម្ពុជា និងសូលទីឡូអង្គរបានអស់ឱកាសប្រជែងជើងឯកលីគកំពូលកម្ពុជាទៅហើយ បន្ទាប់ពីបញ្ចប់ការប្រកួតជុំទី១ ដោយឈរលេខ១០ និងលេខ១២ ក្នុងអគ្គិសនីកម្ពុជារកបាន ៧ពិន្ទុក្នុងដៃ ខណៈសូលទីឡូអង្គររកបាន ៥ពិន្ទុប៉ុណ្ណោះ។ ដូច្នេះក្រុមទាំងពីរ នឹងត្រូវប្រកួតវិលជុំក្នុងចំណោម ៥ក្រុមបាតតារាងដើម្បីស្វែងរកកៅអីសុវត្ថិភាព និង ១ក្រុមដែលមានពិន្ទុតិចជាងគេកាត់ចេញពីលីគកំពូលកម្ពុជាឆ្នាំ២០២២។ ចំពោះលទ្ធផលជួបគ្នា រវាងក្រុមទាំងពីរកាលពីជើងទី១ វិញ អគ្គិសនីកម្ពុជាបានយកឈ្នះក្រុមសូលទីឡូអង្គរក្រៅដី ១-០៕
អត្ថបទ៖ លី ឈុនឡា, រូបភាពពាក់ព័ន្ធ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
