ប្រធានសហជីការងារដ៏ធំបំផុតរបស់អ៊ីស្រាអែល បានអំពាវនាវឲ្យធ្វើកូដកម្មទូទៅមួយ នៅពីថ្ងៃចន្ទ (ទី២ ខែកញ្ញា)នេះ ដើម្បីដាក់សម្ពាធដល់រដ្ឋាភិបាលរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) ឲ្យនាំយកត្រឡប់មកវិញនូវចំណាប់ថ្នូរអ៊ីស្រាអែល ដែលត្រូវបានឃុំខ្លួនដោយក្រុមហាម៉ាស នៅតំបន់ហ្កាហ្សា ខណៈដែលបាតុកររាប់ពាន់នាក់ បានដើរតាមផ្លូវ។

ការអំពាវនាវឲ្យមានកូដកម្មទូទៅរយៈពេលមួយថ្ងៃដោយ លោក Arnon Bar-David ដែលសហជីព ហ៊ីស្ទូឌ្រីត ( Histadrut) តំណាងឲ្យកម្មកររាប់រយពាន់នាក់ ត្រូវបានគាំទ្រដោយក្រុមហ៊ុនផលិត និងសហគ្រិនសំខាន់ៗរបស់អ៊ីស្រាអែល ក្នុងវិស័យបច្ចេកវិទ្យាទំនើប។

សម្ព័ន្ធភាពនៃសំឡេងដ៏មានឥទ្ធិពលបំផុតមួយចំនួន នៅក្នុងសេដ្ឋកិច្ចរបស់ប្រទេសអ៊ីស្រាអែល បានឆ្លុះបញ្ចាំងពីទំហំនៃកំហឹងសាធារណៈចំពោះការប្រកាសកាលពីថ្ងៃអាទិត្យនូវការស្លាប់របស់ចំណាប់ថ្នូរចំនួន ៦នាក់ ក្នុងចំណោមមនុស្សប្រហែល ២៥០នាក់ ដែលត្រូវបានចាប់ខ្លួនដោយក្រុមសកម្មប្រយុទ្ធហាម៉ាសកាលពីថ្ងៃទី ៧ ខែតុលាឆ្នាំមុន។

លោក Bar-David បានប្រាប់សន្និសីទសារព័ត៌មានមួយថា៖«យើងត្រូវតែឈានដល់កិច្ចព្រមព្រៀងមួយ អំពី(ការបញ្ជូនត្រឡប់មកវិញនូវចំណាប់ថ្នូរដែលនៅរស់រានមានជីវិត)។ កិច្ចព្រមព្រៀងនេះ គឺសំខាន់ជាងអ្វីផ្សេងទៀត»។ ប៉ុន្តែ«យើងកំពុងទទួលបានថង់សាកសព ជំនួសឲ្យកិច្ចព្រមព្រៀងទៅវិញ។