ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បាននិយាយនៅក្នុងសន្ទរកថាដែលបានចេញផ្សាយនៅថ្ងៃចន្ទ (០២ កញ្ញា) នេះថា លោកខាងលិចកំពុងធ្វើទុក្ខបុកម្នេញអ្នកសារព័ត៌មានរុស្ស៊ីដោយបើចំហ ប៉ុន្មានថ្ងៃបន្ទាប់ពីទីក្រុងមូស្គូ បានហាមប្រាមអ្នកសារព័ត៌មានតអាមេរិករាប់សិបនាក់មិនឱ្យចូលប្រទេស។

លោក ពូទីន បានប្រាប់សារព័ត៌មានម៉ុងហ្គោលី អូណូដ័រ (Onoodor) នៅមុនដំណើរទស្សនកិច្ចរបស់លោកទៅកាន់ប្រទេសនេះថា «ដើម្បីលាក់បាំងពីព័ត៌មានពិត លោកខាងលិចដែលតែងតែចាត់ទុកខ្លួនឯងជាស្តង់ដារនៃសេរីភាព បានចាប់ផ្តើមធ្វើទុក្ខបុកម្នេញដោយបើកចំហលើអ្នកសារព័ត៌មានរុស្ស៊ី»។

ការលើកឡើងរបស់លោក ពូទីន កើតឡើងបន្ទាប់ពីទីក្រុងមូស្គូ បាននិយាយកាលពីថ្ងៃចុងខែសីហាថា ខ្លួនកំពុងហាមឃាត់ពលរដ្ឋអាមេរិកចំនួន ៩២នាក់មិនឱ្យចូលទៅកាន់ប្រទេសរុស្ស៊ី រួមទាំងអ្នកសារព័ត៌មាន មេធាវី និងជាប្រធានក្រុមហ៊ុនឧស្សាហកម្មយោធាសំខាន់ៗ លើអ្វីដែលខ្លួនបានពិពណ៌នាថាជាជំហរប្រឆាំងរុស្ស៊ីរបស់ទីករក្រុងវ៉ាស៊ីនតោន។

រុស្សីបានចោទប្រកាន់បណ្ដាប្រទេសលោកខាងលិចជាញឹកញាប់ថាបានដាក់កំហិតដ៏អយុត្តិធម៌លើប្រព័ន្ធផ្សព្វផ្សាយរបស់ខ្លួននៅបរទេស រួមទាំងការហាមប្រាមលើបណ្តាញព័ត៌មានដែលគាំទ្រដោយរដ្ឋមួយចំនួន។ លោក ពូទីន បន្ថែមថា អ្នកសារព័ត៌មានរុស្ស៊ីប្រឈមមុខនឹង «ការត្រួតពិនិត្យដ៏តឹងរ៉ឹង» នៅស្ទើរតែគ្រប់ប្រទេសលោកខាងលិចទាំងអស់។

កាលពីខែឧសភា សមាជិកសភារុស្ស៊ី បានអនុម័តច្បាប់ផ្តល់អំណាចដល់រដ្ឋអាជ្ញាក្នុងការបិទការិយាល័យប្រព័ន្ធផ្សព្វផ្សាយបរទេសនៅទីក្រុងមូស្គូ ប្រសិនបើប្រទេសលោកខាងលិច «មិនរាក់ទាក់» ចំពោះប្រព័ន្ធផ្សព្វផ្សាយរុស្ស៊ី៕