អ្នកនាំពាក្យវិមានក្រឹមឡាំង លោក ឌីមីទ្រី ផេស្កូវ (Dmitry Peskov) បាននិយាយថា ប្រទេសរុស្ស៊ី មើលឃើញថាបេក្ខភាពប្រធានាធិបតីនៃគណបក្សប្រជាធិបតេយ្យរបស់សហរដ្ឋអាមេរិក លោកស្រី កាម៉ាឡា ហារីស (Kamala Harris) ជាគូប្រជែងដែលអាចទាយទុកជាមុនបាន និងងាយស្រួលជាងលោក ដូណាល់ ត្រាំ (Donald Trump) មកពីគណបក្សសាធារណរដ្ឋ ប៉ុន្តែទោះជាអ្នកណាជាអ្នកឈ្នះឆ្នោតក៏ដោយ ក៏មិនមានការរំពឹងទុកនៃភាពប្រសើរឡើងលើទំនាក់ទំនងជាមួយទីក្រុងវ៉ាស៊ីនតោនដែរ ។

នៅក្នុងបទសម្ភាសន៍ជាមួយទូរទស្សន៍មួយ លោក Peskov ក៏បានច្រានចោលចំពោះការអួតអាងរបស់លោក Trump ដែលថាលោកអាចបញ្ចប់សង្រ្គាមអ៊ុយក្រែនក្នុងរយៈពេលត្រឹមតែ ២៤ម៉ោង ប្រសិនបើអ្នកបោះឆ្នោតអាមេរិកប្រគល់តំណែងសេតវិមានទៅឱ្យលោក។

មុនពេលលោក ចូ បៃដិន (Joe Biden) ប្រកាសដកខ្លួនចេញពីការបោះឆ្នោតខែវិច្ឆិកា ហើយគាំទ្រលើលោកស្រី Harris ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានលើកឡើងថា ទីក្រុងមូស្គូពេញចិត្តលោក Biden ជាងលោក Trump ដោយពណ៌នាអតីតប្រធានាធិបតីអាមេរិករូបនេះថាជាអ្នកនយោបាយ «បែបចាស់កម្រិល»។

ដោយត្រូវសាកសួរថាតើនរណាជាបេក្ខជនដែលរុស្ស៊ីពេញចិត្តឥឡូវនេះ លោក Peskov បានឆ្លើយទាំងសើចថា «យើងមិនមានបេក្ខជនពេញចិត្តទេ ប៉ុន្តែជាការពិតណាស់ បក្សប្រជាធិបតេយ្យគឺអាចទស្សន៍ទាយបានច្រើនជាងបក្សសាធារណរដ្ឋ ដូចអ្វីដែលលោក ពូទីន ធ្លាប់បានលើកឡើងពីចំពោះអ្នកប្រជាធិបតេយ្យ រួមទាំងលោកស្រី Harris ផងដែរ»។ 

ទំនាក់ទំនងរវាងសហរដ្ឋអាមេរិក និងរុស្ស៊ី កាន់តែមានភាពតានតឹងខ្លាំងឡើងជុំវិញសង្រ្គាមអ៊ុយក្រែន ហើយការបោះឆ្នោតអាមេរិកនាពេលខាងមុខត្រូវបានពិភពលោកយកចិត្តទុកដាក់យ៉ាងខ្លាំង ព្រោះលទ្ធផលអាចជះឥទ្ធិពលយ៉ាងធំលើសណ្ដាប់ធ្នាប់ពិភពលោក៕