អភិបាលតំបន់ Belgorod លោក Vyacheslav Gladkov និយាយថា សាលាមតេយ្យសិក្សាមួយចំនួននឹងត្រូវបិទទ្វាររយៈពេល ១សប្តាហ៍នៅទីក្រុង Belgorod ជិតព្រំដែនអ៊ុយក្រែន ស្របពេលដែលសាលារៀនជាច្រើនកន្លែងទៀត នឹងរៀនតាមអនឡាញ ក្រោយការវាយប្រហាររបស់ទីក្រុងគីវ បានបំផ្លាញមជ្ឈមណ្ឌលថែទាំកុមារមួយកន្លែងនៅថ្ងៃចន្ទនេះ ។

លោក Gladkov និយាយនៅក្នុងសារបង្ហោះតាមបណ្តាញព័ត៌មានសង្គម VKontakte ថា វាគឺជាព្រឹកដ៏អាក្រក់មួយសម្រាប់តំបន់ Belgorod នៅថ្ងៃដែលសាលារៀនចាប់ផ្ងើមការសិក្សាឡើងវិញ ក្រោយវិសម្សកាលរដូវក្តៅ ។ លោកថា សាលារៀនមតេយ្យសិក្សាមួយកន្លែងនៅទីក្រុង Belgorod ត្រូវបានបំផ្លិចបំផ្លាញទាំងស្រុង ។

លោក Gladkov បន្តថា ក្រោយការវាយប្រហារនេះ ក្រុមអាជ្ញាធរបានសម្រេចចិត្តថា សាលារៀនជាច្រើនកន្លែងនៅក្នុងសង្កាត់ Kharkovskaya Gora នឹងរៀនតាមអនឡាញ ខណៈសាលាមតេយ្យសិក្សា នឹងត្រូវបិទទ្វាររយៈពេល ១សប្តាហ៍ ។

ក្រសួងការពារជាតិរុស្ស៊ី និយាយនៅលើបណ្តាញព័ត៌មានសង្គម Telegramថា អង្គភាពការពារដែនអាកាសរុស្ស៊ី បានបំផ្លិចបំផ្លាញយានដ្រូនអ៊ុយក្រែនមួយគ្រឿង កាលពីយប់កន្លងទៅ ។

កងកម្លាំងអ៊ុយក្រែន មានគោលដៅវាយប្រហារលើទីក្រុង Belgorod ជាយូរមកហើយ ។ ទីក្រុងគីវ និយាយថា ពួកគេបានវាយប្រហារលើគោលដៅសំខាន់ៗដែលទីក្រុងម៉ូស្គូ ប្រើប្រាស់សម្រាប់ធ្វើសង្រ្គាមនៅអ៊ុយក្រែន ។

ភាគីទាំង ២ បានច្រានចោលគោលដៅស៊ីវិល នៅក្នុងជម្លោះរយៈពេល ៣០ខែកន្លងមកនេះ ដែលបានផ្តើមចេញពីការវាយលុករបស់ទីក្រុងម៉ូស្គូលើប្រទេសជិតខាងតូចជាងខ្លួនអ៊ុយក្រែន ៕