រដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich បានស្នើឲ្យអគ្គរដ្ឋអាជ្ញារបស់ប្រទេសនេះដាក់សំណើបន្ទាន់មួយទៅកាន់តុលាការ ដើម្បីទប់ស្កាត់កូដកម្មដែលគ្រោងមានទូទាំងប្រទេស នៅថ្ងៃចន្ទ (ទី២ ខែកញ្ញា) នេះ ដោយការធ្វើនេះមានគោលបំណងដាក់សម្ពាធដល់រដ្ឋាភិបាលរបស់នាយករដ្ឋមន្ត្រី លោក Benjamin Netanyahu ឲ្យនាំយកមកវិញនូវចំណាប់ថ្នូរអ៊ីស្រាអែលដែលនៅតែត្រូវបានឃុំខ្លួនដោយក្រុមហាម៉ាស នៅក្នុងតំបន់ហ្កាហ្សា។

នៅក្នុងលិខិតរបស់លោកផ្ញើទៅកាន់អគ្គរដ្ឋអាជ្ញាលោក Gali Baharav-Miara លោក Smotrich បានអះអាងថា កូដកម្មមិនមានមូលដ្ឋានផ្លូវច្បាប់នោះទេ ព្រោះវាមានបំណងជះឥទ្ធិពលមិនត្រឹមត្រូវដល់ការសម្រេចគោលនយោបាយសំខាន់ៗរបស់អ្នកនយោបាយលើបញ្ហាទាក់ទងនឹងសន្តិសុខរដ្ឋ។

លោកក៏បានលើកឡើងផងដែរថា កូដកម្មគ្រប់ទីកន្លេង ដែលនឹងបិទប្រទេស ក្នុងនោះរួមទាំងជើងហោះហើរចេញផងដែរ មានផលវិជ្ជមានដល់សេដ្ឋកិច្ចយ៉ាងធំធេង ដែលនឹងបណ្តាលឲ្យមានការខូចខាតសេដ្ឋកិច្ចធ្ងន់ធ្ងរ នៅក្នុងសម័យសង្គ្រាម។ មិនមានការឆ្លើយតបភ្លាមៗនោះឡើយពីលោក Baharav-Miara។

គួរបញ្ជាក់ថា ការអំពាវនាវឲ្យមានកូដកម្មទូទៅរយៈពេល ១ថ្ងៃ ដោយលោក Arnon Bar-David ដែលសហជីព Histadrut របស់លោក តំណាងឲ្យកម្មកររាប់សែននាក់ ត្រូវបានគាំទ្រដោយក្រុមហ៊ុនផលិត និងសហគ្រិនសំខាន់ៗរបស់អ៊ីស្រាអែល នៅក្នុងវិស័យបច្ចេកវិទ្យាខ្ពស់។ កូដកម្មនឹងចាប់ផ្តើមនៅវេលាម៉ោង ៦ព្រឹក (ម៉ោងក្នុងស្រុក)៕