ក្រសួងសុខាភិបាល បាននិយាយនៅថ្ងៃចន្ទនេះថា ខ្លួនគ្រោងនឹងដាក់ពង្រាយគ្រូពេទ្យយោធា ទៅកាន់បន្ទប់សង្គ្រោះបន្ទាន់របស់មន្ទីរពេទ្យ ចំពេលមានការព្រួយបារម្ភកាន់តែខ្លាំងឡើងចំពោះលទ្ធភាពរំខានដល់ ការថែទាំផ្នែកសង្គ្រោះបន្ទាន់ ក្នុងអំឡុងពេលវិស្សមកាល Chuseok ដោយសារការធ្វើកូដកម្មអូសបន្លាយពេលយូររបស់ក្រុមគ្រូពេទ្យហាត់ការ។

អនុរដ្ឋមន្ត្រីសុខាភិបាលទី២ លោក Park Min-soo បានប្រាប់អ្នកយកព័ត៌មានថា រដ្ឋាភិបាល នឹងបញ្ជូនគ្រូពេទ្យយោធា និងសុខភាពសាធារណៈចំនួន ២៥០នាក់ ដើម្បីទប់ទល់នឹងការថែទាំបន្ទាន់នៅមុន និងក្រោយថ្ងៃឈប់សម្រាក ដែលចាប់ផ្តើមពីថ្ងៃទី ១៤ ដល់ថ្ងៃទី ១៨ ខែកញ្ញា។

លោក Park បាននិយាយថា៖«យើងកំពុងពង្រឹងបុគ្គលិកដោយប្រើប្រាស់គ្រូពេទ្យយោធា និងសាធារណៈ ខណៈជ្រើសរើសគិលានុបដ្ឋាក និងគ្រូពេទ្យជាប់កិច្ចសន្យា»។

ក្រសួង បានបញ្ជាក់ពីចំនួនវេជ្ជបណ្ឌិត រួមទាំងគ្រូពេទ្យឯកទេស និងគ្រូពេទ្យហាត់ការ ដែលបច្ចុប្បន្នកំពុងធ្វើការ នៅក្នុងបន្ទប់សង្គ្រោះបន្ទាន់ចំនួន ៧៣,៤ ភាគរយនៃសមត្ថភាពធម្មតា។