ប្រទេសចិន នៅថ្ងៃចន្ទ (ទី២ ខែកញ្ញា) នេះ បានកា្រលកម្រាលព្រំក្រហមទទួលមេដឹកនាំមកពីទូទាំងទ្វីបអាហ្រ្វិក ដោយការស្វាគមន៍យ៉ាងកក់ក្ដៅនេះត្រូវបានធ្វើឡើង ដើម្បីប្រឹងប្រែងធ្វើឲ្យទំនាក់ទំនងកាន់តែស៊ីជម្រៅជាមួយទ្វីបនេះ ជាទីកន្លែងសម្បូរធនធានដែលខ្លួនបានផ្តល់ប្រាក់កម្ចីរាប់ពាន់លានដុល្លារ ដើម្បីសាងសង់ហេដ្ឋារចនាសម្ព័ន្ធ និងការអភិវឌ្ឍផ្សេងៗ។

ទីក្រុងប៉េកាំងបានប្រាប់ឲ្យដឹងថា វេទិកាចិន-អាហ្រ្វិក នៅសប្តាហ៍នេះ នឹងក្លាយជាព្រឹត្តិការណ៍ការទូតដ៏ធំបំផុតរបស់ខ្លួន គិតចាប់តាំងពីមានជំងឺរាតត្បាតកូវីដ-១៩ ដោយមេដឹកនាំ និងគណៈប្រតិភូរាប់សិបនាក់ត្រូវបានរំពឹងទុកថា នឹងមានវត្តមាន។

គួរបញ្ជាក់ថា ប្រទេសចិនបានបញ្ជូនកម្មកររាប់សែននាក់ទៅកាន់ទ្វីបអាហ្រ្វិក ដើម្បីសាងសង់គម្រោងធំរបស់ខ្លួន ខណៈដែលកំពុងស្វែងរកធនធានធម្មជាតិដ៏ច្រើនមហាសាលរបស់ទ្វីបនេះ ក្នុងនោះរួមមានទង់ដែង មាស លីចូម និងរ៉ែដ៏កម្រៗផងដែរ។ ប្រាក់កម្ចីដ៏ច្រើនសន្ធឹកសន្ធាប់របស់ចិនទៅកាន់ទ្វីបនេះ បានផ្តល់មូលនិធិដល់ហេដ្ឋារចនាសម្ព័ន្ធ ប៉ុន្តែក៏បានបង្កឲ្យមានភាពចម្រូងចម្រាស ដោយសារភាពអាប់អួរបស់ប្រទេសដែលមានបំណុលយ៉ាងច្រើនទាំងនោះ។

យោងតាមប្រព័ន្ធផ្សព្វផ្សាយរដ្ឋចិន បានឲ្យដឹងថា ចិនដែលជាប្រទេសសេដ្ឋកិច្ចធំបំផុតជាងគេលំដាប់លេខ២ របស់ពិភពលោក គឺជាដៃគូពាណិជ្ជកម្មដ៏ធំបំផុតរបស់ទ្វីបអាហ្រ្វិក ដោយទំហំពាណិជ្ជកម្មទ្វេភាគីឈានដល់ ១៦៧,៨ពាន់លានដុល្លារ នៅក្នុងឆមាសទី១ នៃឆ្នាំនេះ។ គេឃើញថា សន្តិសុខត្រូវបានរឹតបន្តឹង នៅទូទាំងទីក្រុងប៉េកាំង ដោយផ្លូវ និងចំណតរថយន្តក្រុង ត្រូវបានតុបតែងដោយបដាដែលប្រកាសថា ប្រទេសចិន និងទ្វីបនេះ កំពុង «រួមដៃគ្នា ដើម្បីអនាគតដ៏ភ្លឺស្វាង»៕