ប្រទេសឥណ្ឌូនេស៊ី កំពុងរៀបចំខ្លួន ដើម្បីស្វាគមន៍សម្តេចសង្ឃកាតូលិក ប៉ាប ហ្វ្រង់ស៊ីស ដែលគ្រោងនឹងយាងទៅរដ្ឋធានីហ្សាការតារបស់ខ្លួន នាថ្ងៃអង្គារ (ទី៣ ខែកញ្ញា) ដែលជាការឈប់សំចតជើងទី១ នៃដំណើរដ៏វែងឆ្ងាយរបស់ព្រះអង្គ។

សម្តេច ប៉ាប គ្រោងនឹងចូលរួមនៅក្នុងកិច្ចប្រជុំអន្តរជំនឿ នៅឯវិហារអ៊ិស្លាម ក្នុងទីក្រុងហ្សាការតា ដែលមានលក្ខណៈពិសេសមិនធម្មតា នោះគឺផ្លូវរូងក្រោមដីដែលភ្ជាប់វិហារនេះទៅនឹងវិហារកាតូលិករបស់ទីក្រុង ដោយការយាងចូលរួមនេះ ជាផ្នែកមួយនៃការជំរុញឲ្យមានសុខដុមរមនាអន្តរជំនឿ អំឡុងដំណើរ នៅអាស៊ីប៉ាស៊ីហ្វិករយៈពេល ១២ថ្ងៃរបស់ព្រះអង្គនេះ។

ដោយនិយាយគ្រាន់តែផ្តល់នាមត្រកូលរបស់ខ្លួន លោក Sunyoto បុគ្គលិកក្រុមហ៊ុនឯកជនវ័យ ៥៧ឆ្នាំ បានប្រាប់ថា៖ «និយាយដោយត្រង់ទៅ ខ្ញុំកាន់សាសនាផ្សេង ប៉ុន្តែខ្ញុំចូលចិត្តការស្វាគមន៍នេះ។ វាមានន័យថា ជាការគោរពផ្ដល់តម្លៃឲ្យគ្នាទៅវិញទៅមក»។ ប្រទេសឥណ្ឌូនេស៊ី មានអ្នកកាន់សាសនាគ្រិស្តតែ ៣ភាគរយប៉ុណ្ណោះ ក្នុងចំណោមប្រជាជន ២៨០លាននាក់របស់ខ្លួន ខណៈជិត ៩០ភាគរយ ជាអ្នកកាន់សាសនាអ៊ិស្លាម។

នៅទីនោះ សម្តេច ប៉ាប ក៏គ្រោងនឹងយាងជួបជាមួយប្រធានាធិបតីជិតផុតអាណត្តិ លោក Joko Widodo ផងដែរ និងប្រារព្ធពិធីដ៏ធំមួយ នៅកីឡដ្ឋាន Jakarta ដែលជាផ្នែកនៃដំណើរទស្សនកិច្ចរបស់ព្រះអង្គទៅកាន់ប្រទេសឥណ្ឌូនេស៊ី។ បន្ទាប់មក ព្រះអង្គនឹងយាងទៅទស្សនកិច្ច នៅប្រទេសប៉ាពួ ញូវ ហ្គីណេ ទីម័រខាងកើត និងសិង្ហបុរី៕