តុលាការការងារអ៊ីស្រាអែល បានសម្រេចថា កូដកម្មឈប់ធ្វើការងារ ដែលឲ្យឈ្មោះថា វិបត្តិចំណាប់ថ្នូរ នៅតំបន់ហ្កាហ្សានោះ ត្រូវតែបញ្ឈប់។ តុលាការបានចូលរួមជាមួយរដ្ឋាភិបាល តាមរយៈការសម្រេចរបស់ខ្លួន នាថ្ងៃចន្ទ (ទី២ ខែកញ្ញា) នេះ ដោយលើកឡើងថា កូដកម្មនេះមានហេតុផលនយោបាយ ហើយត្រូវបញ្ចប់ត្រឹមម៉ោង ២ និង ៣០នាទីរសៀល ម៉ោងក្នុងស្រុក។

គួរបញ្ជាក់ថា សហជីពដ៏ធំបំផុតរបស់អ៊ីស្រាអែល បានអំពាវនាវឲ្យមានកូដកម្មនេះ ដើម្បីតវ៉ានឹងភាពបរាជ័យរបស់រដ្ឋាភិបាល ក្នុងការជួយរំដោះចំណាប់ថ្នូរជាច្រើននាក់ដែលត្រូវបានឃុំខ្លួន នៅតំបន់ហ្កាហ្សា។ ការតវ៉ា នៅថ្ងៃចន្ទ បាននាំឲ្យមានការបិទ និងការរំខានផ្សេងៗទៀត នៅទូទាំងប្រទេស ក្នុងនោះរួមទាំងនៅអាកាសយានដ្ឋានអន្តរជាតិដ៏សំខាន់របស់ខ្លួនផងដែរ។

តែទោះជាយ៉ាងណាក្ដី ការអំពាវនាវនេះត្រូវបានផ្នែកខ្លះមិនអើពើ ដែលឆ្លុះបញ្ចាំងពីការបែកបាក់នយោបាយយ៉ាងស៊ីជម្រៅ នៅក្នុងប្រទេស។

កាលពីល្ងាចថ្ងៃអាទិត្យ (ទី១ ខែកញ្ញា) ប្រជាជនអ៊ីស្រាអែលរាប់សែននាក់ បាននាំគ្នាចេញមកតាមដងផ្លូវ ដើម្បីបង្ហាញភាពសោកសៅ និងកំហឹង បន្ទាប់ពីចំណាប់ថ្នូរ ៦នាក់ ត្រូវបានប្រទះឃើញស្លាប់ នៅក្នុងតំបន់ហ្កាហ្សា។ ក្រុមគ្រួសារ និងសាធារណជនជាច្រើន បានស្តីបន្ទោសនាយករដ្ឋមន្ត្រី លោក Benjamin Netanyahu ដោយនិយាយថា ពួកគេអាចត្រូវបានត្រឡប់មកវិញទាំងរស់ ប្រសិនបើឈានកិច្ចព្រមព្រៀងជាមួយក្រុមហាម៉ាស ដើម្បីបញ្ចប់សង្គ្រាម ដែលមានរយៈពេលជិត ១១ខែនេះ។

ប៉ុន្តែអ្នកផ្សេងទៀត គាំទ្រយុទ្ធសាស្ត្ររបស់លោក Netanyahu ក្នុងការបន្តដាក់សម្ពាធយោធាឥតឈប់ឈរលើក្រុមហាម៉ាស ដែលការវាយប្រហារថ្ងៃទី៧ ខែតុលា ចូលទៅក្នុងដែនដីអ៊ីស្រាអែល បានបង្កឲ្យមានភ្លើងសង្រ្គាមរហូតមកដល់ពេលនេះ។ ពួកគេនិយាយថា នៅទីបំផុត វានឹងបង្ខំឲ្យពួកសកម្មប្រយុទ្ធព្រមចុះចាញ់ ចំពោះការទាមទាររបស់អ៊ីស្រាអែល ដែលអាចនាំឲ្យមានការជួយសង្គ្រោះជោគជ័យជាងនេះ និងទីបំផុត អាចបំផ្លាញក្រុមនេះបាន៕