ការប៉ះទង្គិចគ្នា និងការចាប់ខ្លួនអ្នកតវ៉ានៅតែបន្តផ្ទុះឡើងក្នុងការតវ៉ានៅទីក្រុងហ្សេរុយសាឡឹម (Jerusalem) កាលពីថ្ងៃចន្ទ ដើមសប្ដាហ៍នេះ នៅពេលពលរដ្ឋអ៊ីស្រាអែល ចេញតវ៉ាតាមផ្លូវនានាទាមទារឱ្យមានការដោះលែងចំណាប់ខ្មាំង ដែលត្រូវបានចាប់ខ្លួនដោយក្រុមហាម៉ាសនៅដែនដីហ្កាហ្សា ដោយមានការលើកឡើងថាតើការតវ៉ាដ៏កក្រើកប្រទេសអ៊ីស្រាអែលធំបំផុតនៅពេលនេះអាចនឹងធ្វើឲ្យរង្គោះរង្គើរដល់អំណាចរបស់លោកនាយករដ្ឋមន្ត្រី Benjamin Netanyahuដែរឬទេ?។ 

នៅយប់ថ្ងៃចន្ទ ក្នុងទីក្រុង Tel Aviv ទីក្រុង Jerusalem និងទីក្រុងផ្សេងទៀត ពលរដ្ឋអ៊ីស្រាអែល នៅតែបានបន្តទាមទារឱ្យមានកិច្ចព្រមព្រៀងដោះលែងចំណាប់ខ្មាំង និងបទឈប់បាញ់។ក្រុមបាតុករបានប្ដេជ្ញាថានឹងមិនឈប់សកម្មភាពតវ៉ាឡើយលុះត្រាតែមានការដោះលែងចំណាប់ខ្មាំង។

កងកម្លាំងនគរបាលបានប៉ះទង្គិចជាមួយក្រុមអ្នកតវ៉ា នៅខាងក្រៅគេដ្ឋានរបស់លោក Netanyahu ក្នុងទីក្រុង Jerusalem ដោយបានចាប់ខ្លួនមនុស្សជាច្រើននាក់។ 

ក្រុមបាតុករអ៊ីស្រាអែល បានចេញតវ៉ាតាមផ្លូវសម្រាប់ថ្ងៃទីពីរ ហើយសហជីពការងារដ៏ធំបំផុតបានធ្វើកូដកម្មទូទាំងប្រទេសមួយដើម្បីជំរុញរដ្ឋាភិបាលឱ្យឈានដល់កិច្ចព្រមព្រៀងប្រគល់ចំណាប់ខ្មាំងមកវិញ បន្ទាប់ពីកងកម្លាំងអ៊ីស្រាអែលរកឃើញសាកសពមនុស្ស ៦ នាក់ដែលត្រូវបានឃុំខ្លួននៅហ្កាហ្សាកាលពីចុងសប្ដាហ៍នេះ។ 

ការសង្គ្រោះនៅចុងសប្តាហ៍នៃចំណាប់ខ្មាំងទាំង៦នាក់ ដែលក្រុមអាជ្ញាធរបាននិយាយថា ត្រូវបានគេបាញ់សម្លាប់ក្នុងចន្លោះត្រឹមតែ ៤៨ទៅ៧២ម៉ោង មុនពេលត្រូវបានរកឃើញដោយកងកម្លាំងអ៊ីស្រាអែល បានបង្កឱ្យមានរលកភាពសោកសៅ និងការផ្ទុះកំហឹងនៅទូទាំងអ៊ីស្រាអែល ដោយបានជំរុញឱ្យមនុស្សយ៉ាងហោចណាស់កន្លះលាននាក់ចេញតវ៉ាតាមដងផ្លូវក្នុងទីក្រុង Jerusalem និង Tel Aviv កាលពីថ្ងៃអាទិត្យ។

ក្រុមសកម្មប្រយុទ្ធហាម៉ាស បានចាប់មនុស្ស២៥៣នាក់ជាចំណាប់ខ្មាំងនៅក្នុងការវាយប្រហារកាលពីថ្ងៃទី ៧ តុលាទូទាំងសហគមន៍អ៊ីស្រាអែលដែលបានសម្លាប់ជនជាតិអ៊ីស្រាអែលនិងជនបរទេសចំនួន ១.២០០នាក់ ហើយបានបង្កឱ្យមានការវាយលុកតបតរបស់អ៊ីស្រាអែលឥតឈប់ឈរមកដល់បច្ចុប្បន្ន បំផ្លិចបំផ្លាញដែនដីហ្កាហ្សា និងបានសម្លាប់ប្រជាជនប៉ាឡេស្ទីនជាង ៤០.៦០០នាក់ ៕