អតីតប្រធានាធិបតីអាមេរិក លោក ដូណាល់ ត្រាំ (Donald Trump) ដែលប្រឈមមុខនឹងការចោទប្រកាន់ពីសហព័ន្ធ និងរដ្ឋជុំវិញការព្យាយាមបង្វែរលទ្ធផលឆ្នោតឆ្នាំ២០២០ បានលើកឡើងថាលោកមាន «សិទ្ធិគ្រប់គ្រាន់» ក្នុងការជ្រៀតជ្រែកក្នុងការបោះឆ្នោតនោះ។

នៅក្នុងបទសម្ភាសន៍របស់ទូរទស្សន៍ ហ្វកញូវស៍ (Fox News) ដែលចាក់ផ្សាយកាលពីថ្ងៃអាទិត្យ (០១ កញ្ញា) លោក Trump បានលើកជាសំណួរថា «អ្នកដែលឮទេថាអ្នកជាប់ចោទពីបទជ្រៀតជ្រែកការបោះឆ្នោតប្រធានាធិបតី ទាំងដែលអ្នកមានសិទ្ធិគ្រប់យ៉ាងដើម្បីធ្វើដូច្នេះ»?

គួររម្លឹកថា អ្នកគាំទ្ររបស់លោក Trump បានសម្រុកចូលវិមានកាពីតូលអាមេរិកកាលពីថ្ងៃទី០៦ ខែមករា ឆ្នាំ២០២១ ក្នុងការប៉ុនប៉ងដែលមិនបានសម្រេចមួយដើម្បីរារាំងសភាមិនឱ្យបញ្ជាក់លទ្ធផលឆ្នោតឆ្នាំ២០២០ បន្ទាប់ពីមានការអះអាងមិនពិតជាច្រើនសប្តាហ៍ដោយលោក Trump ថាលោកបានឈ្នះទល់នឹងលោកប្រធានាធិបតី ចូ បៃដិន (Joe Biden)។

បណ្ដឹងរបស់សហព័ន្ធបានចោទប្រកាន់លោក Trump ពីបទបោកប្រាស់ពលរដ្ឋអាមេរិកដោយការប៉ុនប៉ងរារាំងការបញ្ជាក់ពីជ័យជម្នះរបស់លោក Biden នោះ។ បេក្ខភាពប្រធានាធិបតីរបស់បក្សសាធារណរដ្ឋរូបនេះក៏ប្រឈមនឹងការចោទប្រកាន់ថ្មីរបស់សហព័ន្ធកាលពីខែមុន ជុំវិញករណីនេះ។

លោក Trump មិនបានបញ្ជាក់ទេថា តើលោកនឹងទទួលយកលទ្ធផលឆ្នោតថ្ងៃទី០៥ ខែវិច្ឆិកាដោយគ្មានលក្ខខណ្ឌឬយ៉ាងណា ប្រសិនបើគូប្រជែងបក្សប្រជាធិបតេយ្យរបស់ខ្លួនគឺលោកស្រី កាម៉ាឡា ហារីស (Kamala Harris) ជាអ្នកឈ្នះ។ នៅក្នុងសេចក្តីថ្លែងការណ៍មួយកាលពីថ្ងៃចន្ទ យុទ្ធនាការរបស់លោកស្រី Harris បាននិយាយថា ការអត្ថាធិប្បាយចុងក្រោយបំផុតរបស់លោក Trump ទៅកាន់ Fox News និងសុន្ទរកថាពីមុនរបស់លោក «បង្ហាញយ៉ាងច្បាស់ថាលោក Trump ជឿជាក់ថាខ្លួនធំជាងច្បាប់»៕