ព្រំដែនរវាងអ៊ីស្រាអែល និងលីបង់ ត្រូវបានចាត់ទុកថាជាកន្លែងដែលមានអរិភាពបំផុតក្នុងពិភពលោកនៅពេលនេះ ខណៈអ៊ីស្រាអែល និងក្រុមហេសបូឡា បានវាយប្រហារឆ្លងព្រំដែនតបតគ្នាមិនឈប់ឈរអស់ពេលជិតមួយឆ្នាំ។

នៅថ្ងៃទី២៥ ខែសីហា បានមើលឃើញការបាញ់ប្រហារទៅមកខ្លាំងក្លាបំផុតក្នុងពេលជាច្រើនខែ មុនពេលភាគីទាំងពីរដកថយរៀងខ្លួនដើម្បីបញ្ចៀសជម្លោះកាន់តែទូលំទូលាយ។ ខណៈពេលដែលការភ័យខ្លាចនៃសង្គ្រាមរីកធំបានធូរស្រាលបន្តិច ភាពតានតឹងនៅតែមានកម្រិតខ្ពស់ខ្លាំងជាពិសេសក្នុងចំណោមអ្នកស្រុកដែលរស់នៅសងខាងនៃព្រំដែន។

ជនស៊ីវិលអ៊ីស្រាអែល រាប់ម៉ឺននាក់ត្រូវបានជម្លៀសចេញនៅក្នុងតំបន់ព្រំដែនភាគខាងជើង ប៉ុន្តែអ្នកស្រុកមួយចំនួនបានប្តេជ្ញាស្នាក់នៅបន្ត ទោះបីជាមានគ្រោះថ្នាក់ខ្លាំងក៏ដោយ។ អ្នកស្រុកអ៊ីស្រាអែលមួយចំនួននិយាយថា ភូមិរបស់ពួកគេស្ថិតនៅក្រៅតំបន់ជម្លៀសដែលកំណត់ដោយរដ្ឋាភិបាលត្រឹមតែ ៥គីឡូម៉ែត្រប៉ុណ្ណោះ ប៉ុន្តែក៏នៅតែត្រូវរងផលប៉ះពាល់ពីគ្រាប់រ៉ូកែត។ អ្នកស្រុកជាច្រើននៅភាគខាងជើងអ៊ីស្រាអែល បានប្រាប់ថាពួកគេខឹងសម្បារចំពោះស្ថានភាពសន្តិសុខ ហើយមានអារម្មណ៍ថារដ្ឋាភិបាលមិនអើពើ។

នៅទូទាំងព្រំដែនក្នុងប្រទេសលីបង់ មនុស្សជាង ៨០០នាក់ត្រូវបានសម្លាប់ដោយការវាយប្រហាររបស់អ៊ីស្រាអែល ចាប់តាំងពីខែតុលា ឆ្នាំមុនមកនៅពេលដែលក្រុមហេសបូឡា ចាប់ផ្តើមការវាយលុកប្រឆាំងនឹងអ៊ីស្រាអែល ដើម្បីគាំទ្រក្រុមហាម៉ាស។ ភាគច្រើននៃអ្នកស្លាប់គឺជាអ្នកប្រយុទ្ធហេសបូឡា ប៉ុន្តែប្រហែល ១០០នាក់ជាជនស៊ីវិល និងមិនមែនជាអ្នកប្រយុទ្ធ៕