ក្រសួងយុត្តិធម៌សហរដ្ឋអាមេរិក បាននិយាយកាលពីថ្ងៃចន្ទ ទី២ ខែកញ្ញាថា សហរដ្ឋអាមេរិក បានរឹបអូសយកយន្តហោះមួយគ្រឿង ប្រើប្រាស់ដោយប្រធានាធិបតីវេណេស៊ុយអេឡា លោក Nicolas Maduro ហើយបានហោះហើរចេញពីសាធារណរដ្ឋដូមីនីក ទៅកាន់រដ្ឋ Florida បន្ទាប់ពីបានកំណត់ថា ការទិញនេះ បានរំលោភលើទណ្ឌកម្មរបស់សហរដ្ឋអាមេរិក។

ការរឹបអូសយកយន្តហោះនេះ បានកើតឡើងក្នុងពេលមានសម្ពាធដែលនៅតែបន្តលើ លោក Maduro ទាំងក្នុងនិងក្រៅប្រទេស ជុំវិញការបោះឆ្នោតកាលពីថ្ងៃទី២៨ ខែកក្កដា ដែលលោកអះអាងថាបានទទួលជ័យជម្នះ ខណៈគណបក្សប្រឆាំង បាននិយាយថា ចំនួនសន្លឹកឆ្នោតសរុប បង្ហាញថាបេក្ខជនរបស់ខ្លួន បានធ្វើឲ្យលោក Maduro បរាជ័យយ៉ាងខ្លាំង។

លោក Maduro សហការីរបស់លោក និងវិស័យប្រេងដ៏សំខាន់របស់រដ្ឋសមាជិកអង្គការOPEC មួយនេះ ស្ថិតនៅក្រោមការដាក់ទណ្ឌកម្មធ្ងន់ធ្ងររបស់សហរដ្ឋអាមេរិក ហើយដំណោះស្រាយរបស់លោកចំពោះការបោះឆ្នោត បានបង្កើនការរំពឹងទុកថា វិធានការបន្ថែមទៀតអាចនឹងត្រូវបានដាក់។

រដ្ឋអាជ្ញាសហរដ្ឋអាមេរិក លោក Merrick Garland បាននិយាយនៅក្នុងសេចក្តីថ្លែងការណ៍ ថា យន្តហោះ Dassault Falcon 900EX ត្រូវបានទិញដោយខុសច្បាប់ក្នុងតម្លៃ ១៣លានដុល្លារ តាមរយៈក្រុមហ៊ុន Shell ហើយបានរត់ពន្ធចេញពីសហរដ្ឋអាមេរិក សម្រាប់លោក Nicolas Maduro និងក្រុមរបស់លោកប្រើប្រាស់។

មន្ត្រីសហរដ្ឋអាមេរិក បាននិយាយថា ការរឹបអូស ដែលត្រូវបានរាយការណ៍ដំបូងដោយប្រព័ន្ធផ្សព្វផ្សាយ CNN ត្រូវបានអនុវត្តដោយធ្វើការយ៉ាងជិតស្និទ្ធ ជាមួយសាធារណរដ្ឋដូមីនីក។