សមាជិកនៃចលនាសង្គមប្រទេសបូលីវី ដែលគេស្គាល់ថា Red Ponchos បានធ្វើដំណើរចូលទៅក្នុងទីក្រុង La Paz ដើម្បីបង្ហាញពីការមិនសប្បាយចិត្តរបស់ពួកគេ ចំពោះសេដ្ឋកិច្ចរបស់ប្រទេស ដែលជាប់គាំង បណ្តាលឱ្យមានការប៉ះទង្គិចគ្នាជាមួយនគរបាល កាលពីថ្ងៃចន្ទ។

ក្រុមចលនា Red Ponchos បានដុតធុងចាក់សំរាម និងបានគប់របស់ផ្សេងៗ ទៅលើនគរបាល ដែលកំពុងយាមទីស្នាក់ការសហជីពកសិករ និងបានវាយដំលើមន្ត្រីយ៉ាងហោចណាស់ម្នាក់ ខណៈនគរបាល បានបាញ់ឧស្ម័នបង្ហៀរទឹកភ្នែក និងគ្រាប់កាំភ្លើងជ័រទៅលើក្រុមអ្នកតវ៉ា។

ក្រុមនេះ បានព្យាយាមដណ្តើមយកទីស្នាក់ការសហជីព ដែលស្ថិតក្នុងដៃរបស់ប្លុកដែលគាំទ្ររដ្ឋាភិបាលរបស់ប្រធានាធិបតី លោក លូអ៊ីស អាស(Luis Arce)។

ក្រុមបាតុករ ក៏បានអំពាវនាវឲ្យលោក Arce ស្វែងរកដំណោះស្រាយចំពោះវិបត្តិសេដ្ឋកិច្ចរបស់ប្រទេសតំបន់ភ្នំអង់មួយនេះ។

ប្រភពរដ្ឋាភិបាល បាននិយាយថា ការប៉ះទង្គិចគ្នានេះ បានធ្វើឱ្យមន្ត្រី៧នាក់ និងជនស៊ីវិល២នាក់ រងរបួស ។