យោងតាមអាជ្ញាធរគ្រប់គ្រងគ្រោះមហន្តរាយជាតិ បានឱ្យដឹងថា មនុស្សសរុប២៩៣នាក់ បានស្លាប់ និង៥៦៤នាក់ផ្សេងទៀត បានរងរបួស នៅក្នុងឧបទ្ទវហេតុដែលបង្កឡើងដោយភ្លៀងមូសុងនៅក្នុងប្រទេសប៉ាគីស្ថាន ក្នុងរយៈពេល២ខែចុងក្រោយនេះ ខណៈភ្លៀងធ្លាក់ខ្លាំងបានបន្តបំផ្លិចបំផ្លាញនៅក្នុងតំបន់មួយចំនួនរបស់ប្រទេសនេះ។

ទីភ្នាក់ងារ បាននិយាយថា ភ្លៀងធ្លាក់ខ្លាំងបានធ្វើឱ្យខូចខាតដោយផ្នែក ឬទាំងស្រុង ដល់លំនៅឋានចំនួន១៩.៥៧២ខ្នង ស្ពានចំនួន៣៩កន្លែង និងសាលារៀនជាច្រើនទៀត នៅទូទាំងប្រទេស ហើយសត្វពាហនៈប្រមាណ ១.០៧៧ក្បាល បានងាប់ ចាប់ពីថ្ងៃទី១ ខែកក្កដា ដល់ថ្ងៃទី៣១ ខែសីហា។

ការខូចខាត អ្នកស្លាប់និងរងរបួសភាគច្រើន ត្រូវបានរាយការណ៍ពីខេត្ត Punjab ភាគខាងកើត ជាកន្លែងដែលមនុស្ស១១២នាក់ បានស្លាប់ និង៣០២នាក់ផ្សេងទៀត បានរងរបួសដោយសារភ្លៀងធ្លាក់ខ្លាំង បន្ទាប់មកគឺខេត្ត Khyber Pakhtunkhwa ភាគពាយ័ព្យ មានអ្នកស្លាប់ចំនួន៨៨នាក់ និងរបួស ១២៩នាក់។

ទីភ្នាក់ងារ និយាយថា ភ្លៀងធ្លាក់ពីមធ្យមទៅច្រើន ត្រូវបានគេរំពឹងថានឹងកើតមាននៅតំបន់មួយចំនួនរបស់ប្រទេសប៉ាគីស្ថាន ក្នុងរយៈពេលប៉ុន្មានថ្ងៃខាងមុខនេះ។