អនុរដ្ឋមន្ត្រីការបរទេសរុស្ស៊ីលោក ហ្សឺហ្គេ រីយ៉ាបកូវ (Sergey Ryabkov) បានព្រមានថា ការសម្រេចចិត្តរបស់សហរដ្ឋអាមេរិកក្នុងការផ្លាស់ប្តូរគោលនយោបាយនុយក្លេអ៊ែររបស់ខ្លួន អាចប៉ះពាល់ដល់សន្តិសុខពិភពលោកយ៉ាងធ្ងន់ធ្ងរ។

សារព័ត៌មាន New York Times បានរាយការណ៍កាលពីខែមុនថា រដ្ឋបាលរបស់លោកប្រធានាធិបតី Joe Biden បានអនុម័តកំណែថ្មីនៃយុទ្ធសាស្ត្រនុយក្លេអ៊ែរដែលមានចំណាត់ថ្នាក់ខ្ពស់កាលពីខែមីនា ដោយមានការផ្លាស់ប្តូរផ្តោតលើសមត្ថភាពនុយក្លេអ៊ែររបស់ចិន ដែលកំពុងកើនឡើងខ្លាំង។ យោងតាមសារព័ត៌មានដដែលនេះបានឲ្យដឹងថា ឯកសារនេះបានពិចារណាពីបញ្ហាប្រឈមផ្នែកនុយក្លេអ៊ែរពីប្រទេសចិន រុស្ស៊ី និងកូរ៉េខាងជើង។

នៅក្នុងបទសម្ភាសន៍ជាមួយទីភ្នាក់ងារសារព័ត៌មាន TASS កាលពីថ្ងៃអាទិត្យ លោក រីយ៉ាបកូវ បាននិយាយថា ខណៈដែលឆាប់ពេកក្នុងការធ្វើអត្ថាធិប្បាយលើចំណុចជាក់លាក់នៃយុទ្ធសាស្ត្រថ្មីនេះ ដោយសារមិនទាន់ត្រូវបានប្រកាសជាសាធារណៈមានសញ្ញាដំបូងជាច្រើនគួរឱ្យព្រួយបារម្ភ។

លោកបន្ថែមថា ដោយមើលឃើញគោលនយោបាយការបរទេសរងការបំផ្លិចបំផ្លាញយ៉ាងខ្លាំងពីសំណាក់ទីក្រុងវ៉ាស៊ីនតោន ការកែប្រែណាមួយអាចត្រូវបានរំពឹងទុក រួមទាំងការបង្កឱ្យមានអស្ថិរភាពយ៉ាងខ្លាំងផងដែរ ។

សហរដ្ឋអាមេរិក និងរុស្ស៊ី មានឃ្លាំងអាវុធនុយក្លេអ៊ែរធំជាងគេបំផុតក្នុងពិភពលោក ដែលមានក្បាលគ្រាប់ប្រហែល ៥.០០០ និង ៥.៥០០ គ្រាប់។ មហាអំណាចទាំងពីរក៏ជាម្ចាស់ហត្ថលេខីនៃសន្ធិសញ្ញា New START កំណត់ចំនួនក្បាលគ្រាប់នុយក្លេអ៊ែរយុទ្ធសាស្ត្រ ដែលបានដាក់ពង្រាយដល់១.៥៥០ គ្រាប់ ។ ប្រទេសចិនដែលត្រូវបានគេប៉ាន់ប្រមាណថាមាននុយក្លេអ៊ែប្រហែល ៥០០គ្រាប់បានបង្ហើបថាខ្លួនពុំមានគម្រោងចូលរួមក្នុងសន្ធិសញ្ញានេះទេ៕