ក្រុមឧតុនិយមបានបញ្ជាក់ថា ប្រទេសអូស្ត្រាលី ទើបតែបានឆ្លងកាត់ខែសីហា ដែលក្ដៅខ្លាំងបំផុតក្នុងកំណត់ត្រា ជាមួយនឹងសីតុណ្ហភាពជាមធ្យមរយៈពេលវែងលើសពី ៣អង្សាសេ រួមទាំងរដូវរងាដែលមានអាកាសធាតុក្តៅបំផុតទីពីររបស់ខ្លួន។

ទិន្នន័យរបស់ការិយាល័យឧតុនិយមបានបង្ហាញថា ខែសីហា ជាខែដែលក្តៅបំផុតចាប់តាំងពីកំណត់ត្រាបានចាប់ផ្តើមនៅឆ្នាំ១៩១០មក ដោយផ្នែកជាច្រើននៃទ្វីបបានកត់ត្រាសីតុណ្ហភាពកម្រិតអតិបរមា និងអប្បបរមា ដែលមិនធ្លាប់មានពីមុនមក។ ការិយាល័យនេះបន្តថា សីតុណ្ហភាពមធ្យមក្នុងតំបន់ទូទាំងប្រទេសអូស្ត្រាលី គឺមានកម្រិត ៣,០៣អង្សាសេ ខ្ពស់ជាងមធ្យមភាគរយៈពេលវែង។

ចាប់ពីឆ្នេរសមុទ្រភាគខាងលិចទៅខាងកើត សីតុណ្ហភាពបំបែកកំណត់ត្រាត្រូវបានចុះបញ្ជី រួមទាំងសីតុណ្ហភាពរដូវរងាខ្ពស់បំផុត ៤១,៦អង្សាសេ នៅឯមូលដ្ឋានយោធានៅលើតំបន់ឆ្នេរដាច់ស្រយាលនៅភាគពាយព្យ។ សរុបមក រដូវរងានេះគឺមានអាកាសធាតុក្តៅបំផុតទីពីររបស់អូស្ត្រាលីក្នុងកំណត់ត្រាបន្ទាប់ពីឆ្នាំ២០២៣។

ប្រហែល ១៨ភាគរយនៃប្រទេសអូស្ត្រាលីគឺជាវាលខ្សាច់ ហើយកម្ដៅខ្លាំងពេញមួយឆ្នាំគឺជារឿងធម្មតានៅឆ្ងាយពីតំបន់អាកាសធាតុមធ្យម ប៉ុន្តែទិន្នន័យកំណើនសីតុណ្ហភាពជាលំដាប់សម្រាប់អូស្ត្រាលីដោយបម្រែបម្រួលអាកាសធាតុ បានជំរុញឱ្យមានចំហេះព្រៃ ទឹកជំនន់ គ្រោះរាំងស្ងួត និងរលកកម្ដៅកាន់តែខ្លាំងក្លា៕