ប្រទេសចិន បាននិយាយនៅថ្ងៃអង្គារ (០៣ កញ្ញា) នេះថា ខ្លួនគ្រោងនឹងចាប់ផ្តើមការស៊ើបអង្កេតប្រឆាំងការលក់បង្ខូចតម្លៃចំពោះការនាំចូលដំណំាផ្កាផលិតប្រេង កាណូឡា (canola) ពីកាណាដា បន្ទាប់ពីទីក្រុងអូតាវ៉ា ដាក់ពន្ធលើរថយន្តអគ្គិសនីរបស់ចិន ដោយអាចឱ្យតម្លៃប្រេងឆៅក្នុងស្រុកនាពេលអនាគតឡើងដល់កម្រិតខ្ពស់បំផុតក្នុងពេលមួយខែ។

កាណាដា បានធ្វើតាមការនាំមុខរបស់សហរដ្ឋអាមេរិក និងសហភាពអឺរ៉ុប ហើយបានប្រកាសកាលពីសប្តាហ៍មុននូវពន្ធ ១០០ភាគរយ លើការនាំចូលរថយន្តអគ្គិសនីរបស់ចិន និងពន្ធ ២៥ភាគរយ លើការនាំចូលដែកថែប និងអាលុយមីញ៉ូមពីប្រទេសចិន។

អ្នកនាំពាក្យក្រសួងពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា «ទីក្រុងប៉េកាំង បដិសេធយ៉ាងដាច់អហង្ការ និងប្រឆាំងយ៉ាងម៉ឺងម៉ាត់ចំពោះវិធានការរឹតត្បិតឯកតោភាគីដ៏រើសអើង ដែលធ្វើឡើងដោយកាណាដា ប្រឆាំងនឹងការនាំចូលពីចិន ទោះបីជាមានការប្រឆាំង និងមិនពេញចិត្តពីភាគីជាច្រើនក៏ដោយ»។

កាណាដាគឺជាប្រទេសនាំចេញរុក្ខជាតិកាណូឡាដ៏ធំរបស់ពិភពលោកដែលប្រើប្រាស់ក្នុងម្ហូបអាហារ និងជីវឥន្ធនៈ ហើយចិនជាអ្នកទិញគ្រាប់ធញ្ញជាតិផលិតប្រេងធំបំផុតរបស់ពិភពលោក។ 

ក្រសួងបាននិយាយថា «ការនាំចេញដំណាំកាណូឡារបស់កាណាដាទៅកាន់ចិនបានកើនឡើងយ៉ាងខ្លាំង ហើយត្រូវបានសង្ស័យថាមានលក់ទាបជាងតម្លៃទីផ្សារ ដែលឈានដល់ ៣,៤៧ពាន់លានដុល្លារក្នុងឆ្នាំ២០២៣ ជាមួយនឹងកំណើនបរិមាណ ១៧០ភាគរយ ធៀបនឹងឆ្នាំមុន ខណៈតម្លៃធ្លាក់ចុះជាបន្តបន្ទាប់»។ អ្នកនាំពាក្យរូបនេះបានបន្ថែមថា ចិនក៏នឹងចាប់ផ្តើមការស៊ើបអង្កេតប្រឆាំងការលក់បង្ខូចថ្លៃលើផលិតផលគីមីមួយចំនួនទៀតរបស់កាណាដាផងដែរ៕