វេជ្ជបណ្ឌិតហាត់ការនៅទីក្រុង Kolkata ប្រទេសឥណ្ឌា បានធ្វើការតវ៉ាអង្គុយពេញមួយយប់នៅថ្ងៃអង្គារ ទី៣ ខែកញ្ញា ដោយទាមទាររកយុត្តិធម៌ ក្នុងសំណុំរឿងចាប់រំលោភនិងសម្លាប់វេជ្ជបណ្ឌិតហាត់ការម្នាក់ នៅក្នុងទីក្រុងនេះ។

ក្រុមអ្នកតវ៉ា បានទាមទារទៅជួបស្នងការនគរបាល ជុំវិញការដោះស្រាយមិនបានគាប់ប្រសើរតាមដែលបានចោទប្រកាន់នូវភ័ស្តុតាងក្នុងសំណុំរឿងចាប់រំលោភ ហើយត្រូវបានគេមើលឃើញមានសរសេរពាក្យស្លោក ច្រៀងចម្រៀង និងវាយដបប្លាស្ទិកទៅលើដី។

អ្នកតវ៉ាម្នាក់នៅទីតាំងនោះ និយាយថា ពួកគេនឹងបន្តការតវ៉ាដោយអង្គុយ រហូតដល់អាជ្ញាធរដករបាំងការពារចេញ ហើយអនុញ្ញាតឱ្យក្រុមវេជ្ជបណ្ឌិតហែរក្បួនទៅកាន់ស្នងការនគរបាល ឬរហូតដល់ស្នងការ ចុះទៅជួបពួកគេដោយផ្ទាល់។

វេជ្ជបណ្ឌិតនៅទូទាំងប្រទេស បានធ្វើការតវ៉ា បន្ទាប់ពីការសម្លាប់វេជ្ជបណ្ឌិតស្ត្រីហាត់ការម្នាក់អាយុ ៣១ឆ្នាំ កាលពីថ្ងៃទី៩ ខែសីហា ជាអ្នកដែលត្រូវបានគេចាប់រំលោភនិងសម្លាប់ នៅមន្ទីរពេទ្យមួយកន្លែងក្នុងទីក្រុង Kolkata ភាគខាងកើត ប្រទេសឥណ្ឌា ។