យោធារុស្ស៊ី បានវាយប្រហារទៅលើរដ្ឋធានីគីវ ប្រទេសអ៊ុយក្រែន និងតំបន់ជាច្រើនផ្សេងទៀត ក្នុងប្រទេសកាលពីថ្ងៃចន្ទ។

ការវាយលុកនេះ បានបណ្តាលឱ្យអគារជនស៊ីវិលរស់នៅជាច្រើនកន្លែងរងការបំផ្លាញ។ យោធាប្រទេសអ៊ុយក្រែន និយាយថា មីស៊ីលចំនួន៣៥គ្រាប់ និងយានដ្រូនវាយប្រហារចំនួន ២៣គ្រឿង ចេញមកពីប្រទេសរុស្ស៊ី។

ការព្រមានអំពីការវាយឆ្មក់តាមអាកាស បានដាក់រយៈពេលជិតពីរម៉ោងក្នុងទីក្រុងគីវ នៅអំឡុងពេលថ្ងៃ។ អាជ្ញាធរទីក្រុង បាននិយាយថា កម្ទេចកម្ទីពីគ្រាប់មីស៊ីល ត្រូវបានគេឃើញនៅក្នុងទីតាំងចំនួន៨កន្លែង នៅក្នុងទីក្រុង ហើយមនុស្សមួយចំនួន បានរងរបួស។

ក្នុងករណីមួយ កម្ទេចកម្ទីរបានធ្លាក់លើឡចំហាយទឹកនៅសាលារៀនមួយកន្លែង បណ្តាលឲ្យមានអគ្គិភ័យ ប៉ុន្តែត្រូវបានពន្លត់។ 

សមាជិកបុគ្គលិករបស់ប្រព័ន្ធផ្សព្វផ្សាយ NHK បានឃើញ ជញ្ជាំង និងដំបូល បានបាក់រលំ ហើយបុគ្គលិក បានឈូសឆាយសម្អាតនិងយកចេញកម្ទេចកម្ទី។

កម្ទេចកម្ទី ពីមីស៊ីល ទំនងជាបានធ្លាក់នៅក្បែរស្ថានីយរថភ្លើងក្រោមដីមួយកន្លែងផងដែរ។ បង្អួច របស់ស្ថានីយ៍រថភ្លើងត្រូវបានបំផ្លាញ។ ហាងជាច្រើនកន្លែង នៅជិតស្ថានីយ បានរងការខូចខាត ហើយស្លាកសញ្ញាជាច្រើន បានធ្លាក់ព្យួរ។

នៅហាងនំប៉័ងមួយកន្លែង ពិដានបានបាក់ ហើយចរន្តអគ្គិសនី ត្រូវបានកាត់ផ្តាច់ ដែលបញ្ហានេះ បានធ្វើឲ្យហាងមានការលំបាកក្នុងការបន្តធ្វើអាជីវកម្ម។