គ្រោះរាំងស្ងួតជាប់កំណត់ត្រាកាលពីឆ្នាំមុននៅតំបន់ព្រៃជប់ភ្លៀងអាម៉ាហ្សូន និងភ្លៀងធ្លាក់តិចខុសពីធម្មតា ចាប់តាំងពីកម្រិតទឹកទន្លេធ្លាក់ចុះយ៉ាងឆាប់រហ័ស បានរារាំងដល់ការធ្វើនាវាចរណ៍របស់នាវាដឹកគ្រាប់ធុញ្ញជាតិ សម្រាប់ការនាំចេញ និងកាត់ផ្តាច់សហគមន៍តាមដងទន្លេដែលពឹងផ្អែកលើការដឹកជញ្ជូនតាមទន្លេ ។

សេវាកម្មភូគព្ភសាស្ត្រប្រេស៊ីល(SGB) បានព្រមានថា កម្រិតទឹកបានធ្លាក់ចុះ ចាប់តាំងពីខែមិថុនារហូតមក ហើយទន្លេទាំងអស់នៅបាសាំងព្រៃជប់ភ្លៀងអាម៉ាហ្សូន ត្រូវបានគេរំពឹងថា នឹងធ្លាក់ចុះក្រោមកម្រិតប្រវត្តិសាស្រ្ត ។

នៅទីក្រុង Manaus ទន្លេ Rio Negro មានទឹកជម្រៅ ២១ម៉ែត្រ ធ្លាក់ចុះពីជម្រៅ ២៤ម៉ែត្រក្នុងពេលតែមួយកាលពីឆ្នាំ ២០២៣ ដែលនឹងចាប់ផ្តើមឲ្យមានការព្រួយបារម្ភដល់ឧស្សាហកម្មនៅតំបន់ពាណិជ្ជកម្មសេរី ជាទីដែលក្រុមធុរកិច្ចបានស្នើសុំឲ្យការងារបូមខ្សាច់ចាប់ផ្តើម ដើម្បីចៀសវាងការអាក់ខានការដឹកជញ្ជូនដូចកាលពីឆ្នាំមុន ។

ដោយឡែក ផ្ទះបណ្តែតទឹកដែលប្រើប្រាស់នៅលើទន្លេ បច្ចុប្បន្ននៅលើដីស្ងួត ធ្វើឲ្យក្រុមប្រជានេសាទ្យពិបាករកស៊ីចិញ្ចឹមជីវិតប្រចាំថ្ងៃ ។

ភ្លៀងធ្លាក់បន្ថែមទៀត ត្រូវបានគេរំពឹងថា នឹងកើតមាននៅឆមាសទី ២ក្នុងឆ្នាំនេះ ដោយសារបាតុភូតធម្មជាតិ ឡា នីញ៉ា ដែលធ្វើឲ្យទឹកត្រជាក់នៅមហាសមុទ្រប៉ាស៊ីហ្វិក ជិតប្រទេសអេក្វាឌ័រ ហើយវានឹងនាំភាពសំណើមកាន់តែច្រើនដល់តំបន់ភាគខាងជើងប្រទេសេប្រេស៊ីល និងអាកាសធាតុស្ងួតនៅតំបន់ភាគខាងត្បូង ៕