ប្រធានាធិបតីសហរដ្ឋអាមេរិក លោក Joe Biden និងអនុប្រធានាធិបតី លោកស្រី Kamala Harris បានធ្វើយុទ្ធនាការរួមគ្នាជាលើកដំបូង កាលពីថ្ងៃចន្ទ (ទី២ ខែកញ្ញា) ដោយបង្ហាញជាសាធារណៈនូវការរួបរួមគ្នាជាក្រុម បន្ទាប់ពីលោកស្រី Harris បានជំនួសតំណែងបេក្ខជនរបស់លោក Biden និងធ្វើឲ្យក្តីសង្ឃឹមនៃការបោះឆ្នោតរបស់គណបក្សប្រជាធិបតេយ្យមានឡើងវិញ។

ដោយប្រឹងប្រែងទាក់ទាញអ្នកបោះឆ្នោត នៅក្នុងរដ្ឋ Pennsylvania ដែលជារដ្ឋសមរភូមិដ៏សំខាន់ អ្នកទាំង២ បានជួបសមាជិកសហជីព នៅទីក្រុង Pittsburg មុនពេលឈរក្បែរគ្នា ដើម្បីនិយាយទៅកាន់អ្នកគាំទ្រប្រហែល ៦០០នាក់។

លោក Biden បានបង្ហាញពីភាពប្រាកដប្រជាចំពោះឈ្មោះលោកស្រី Harris ម្តងហើយម្តងទៀត ដែលកំពុងស្ថិតក្នុងការប្រជែងយ៉ាងស្វិតស្វាញ ដើម្បីយកជ័យជម្នះលើលោក Donald Trump សម្រាប់តំណែងសេតវិមាន នៅថ្ងៃទី៥ ខែវិច្ឆិកា។ លោក Biden បាននិយាយថា «យើងបានធ្វើឲ្យមានការរីកចំរើនជាច្រើន ហើយលោកស្រី Kamala និងខ្ញុំនឹងពង្រឹងវឌ្ឍនភាពនោះ ហើយលោកស្រីនឹងប្រឹងប្រែងពង្រឹងបន្ថែម។ ខ្ញុំនឹងនៅក្រៅការប្រកួតប្រជែង ប៉ុន្តែខ្ញុំនឹងធ្វើអ្វីគ្រប់យ៉ាងដែលខ្ញុំអាចធ្វើបានដើម្បីជួយដល់យុទ្ធនាការ»។

ព្រឹត្តិការណ៍ទិវាពលកម្ម នៅសហជីពអន្តរជាតិនៃកម្មករអគ្គិសនី បានគូសបញ្ជាក់ពីរបៀបដែលលោក Biden នឹងដើរតួនាទីក្នុងយុទ្ធនាការនៅប៉ុន្មានខែចុងក្រោយ មុនដល់ពេលបោះឆ្នោត។

គួរបញ្ជាក់ថា លោក Biden វ័យ ៨១ឆ្នាំ ដំបូងឡើយបានប្រឹងជម្នះមិនចង់ចាកចេញពីការប្រកួតប្រជែងតំណែងប្រធានាធិបតីនោះឡើយ បន្ទាប់ពីធ្វើមិនបានល្អក្នុងការជជែកដេញដោលទល់នឹងលោក Trump ប៉ុន្តែរូបលោកចាប់ពីពេលនោះមក បានផ្លាស់ទៅឈរជាកម្លាំងជំរុញខាងលោកស្រី Harris វ័យ ៥៩ឆ្នាំវិញ៕