ប្រធានាធិបតីអ៊ុយក្រែនលោក Volodymyr Zelenskiy កាលពីថ្ងៃចន្ទ (ទី២ ខែកញ្ញា) បាននិយាយថា លោកនឹងជួបជាមួយប្រមុខទីភ្នាក់ងារនុយក្លេអ៊ែរអន្តរជាតិ នៅទីក្រុងគីវ បន្ទាប់ពីលោកប្រធានរូបនោះបានទៅទស្សនកិច្ចជាផ្លូវការ នៅរោងចក្រនុយក្លេអ៊ែរ Zaporizhzhia ដែលស្ថិតនៅក្រោមការគ្រប់គ្រងរបស់រុស្ស៊ី ចាប់តាំងពីសង្រ្គាមបានចាប់ផ្តើម។

កាលពីល្ងាចថ្ងៃចន្ទ លោក Rafael Grossi ប្រធាននៃក្រុមឃ្លាំមើលនុយក្លេអ៊ែររបស់ទីភ្នាក់ងារថាមពលបរិមាណូអន្តរជាតិ (IAEA) បានឲ្យដឹងនៅក្នុងការបង្ហោះលើបណ្តាញសង្គម X ថា លោកកំពុងធ្វើដំណើរទៅកាន់រោងចក្រនោះ ដើម្បី «បន្តជំនួយ និងជួយទប់ស្កាត់ឧបទ្ទវហេតុនុយក្លេអ៊ែរ» ។

គួរបញ្ជាក់ថា រោងចក្រនៅភាគអាគ្នេយ៍នៃប្រទេសអ៊ុយក្រែន ដែលជារោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុប ហើយឥឡូវនេះត្រូវបានបិទនោះ បានធ្លាក់ទៅក្នុងការគ្រប់គ្រងរបស់កងទ័ពរុស្ស៊ី នៅថ្ងៃដំបូងនៃការលុកលុយពេញលេញរបស់ទីក្រុងមូស្គូ ក្នុងឆ្នាំ២០២២។

ចាប់តាំងពីពេលនោះមក ភាគីទាំង២ តែងតែបានចោទប្រកាន់គ្នាទៅវិញទៅមកជាញឹកញាប់ អំពីការបាញ់ផ្លោងសំដៅទៅរោងចក្រនេះ ហើយទាំងក្រុងមូស្គូ និងទីក្រុងគីវ បានបដិសេធការចោទប្រកាន់ទាំងនេះ។

កាលពីថ្ងៃចន្ទ លោក Zelenskiy និងនាយករដ្ឋមន្ត្រីហូឡង់លោក Dick Schoof បានទៅមើល Zaporizhzhia ជាទីក្រុងដែលស្ថិតនៅកាត់តាមដងទន្លេដ៏ធំទូលាយនៃទីក្រុង Dnipro ទៅភាគឦសាននៃរោងចក្រ ជាកន្លែងដែលមេដឹកនាំអ៊ុយក្រែន បានទទូចឲ្យលោកខាងលិចផ្គត់ផ្គង់អាវុធចម្ងាយឆ្ងាយបន្ថែមទៀតដល់ទីក្រុងគីវ ។

បើយោងតាមវីដេអូពីការិយាល័យរបស់លោក Zelenskiy នៅលើបណ្ដាញសង្គម បានឲ្យដឹងថា លោក Zelenskiy បានប្រាប់ថា បន្ទាប់ពីលោក Grossi ទៅមើលរោងចក្រនេះ លោកគ្រោងនឹងបន្តដំណើរទៅទីក្រុងគីវ ដើម្បីជួបជាមួយបណ្ដាមេដឹកនាំអ៊ុយក្រែន៕