ប្រមុខអ្នកបង្រៀនសាសានាជនជាតិជ្វីហ្វរបស់ចក្រភពអង់គ្លេស បានរិះគន់ការសម្រេចរបស់រដ្ឋាភិបាលក្នុងការផ្អាកអាជ្ញាប័ណ្ណនាំចេញអាវុធមួយចំនួនទៅអ៊ីស្រាអែល រយៈពេលត្រឹមតែប៉ុន្មានថ្ងៃប៉ុណ្ណោះបន្ទាប់ពីមានការសម្លាប់ចំណាប់ថ្នូរអ៊ីស្រាអែល ៦នាក់ នៅក្នុងតំបន់ហ្កាហ្សា។

លោក Ephraim Mirvis បានលើកឡើងនៅលើបណ្ដាញសង្គម X ថា៖ «វាជារឿងមិនគួរឲ្យជឿទាល់តែសោះដែលថា រដ្ឋាភិបាលអង់គ្លេសជាសម្ព័ន្ធមិត្តយុទ្ធសាស្ត្រដ៏ជិតស្និទ្ធរបស់អ៊ីស្រាអែល បានប្រកាសពីការព្យួរផ្នែកខ្លះនៃអាជ្ញាប័ណ្ណលក់អាវុធ»។ លោកបាននិយាយថា វិធានការនេះនឹងជំរុញការអះអាងគ្មានមូលដ្ឋានដែលថា អ៊ីស្រាអែលបំពានច្បាប់មនុស្សធម៌អន្តរជាតិ។

លោក Mirvis បានប្រាប់ថា៖ «គួរឲ្យសោកស្ដាយណាស់ ការប្រកាសនេះនឹងកា្លយជាការលើកទឹកចិត្តដល់សត្រូវរួមរបស់យើង។ វានឹងមិនជួយធានាឲ្យមានការដោះលែងចំណាប់ថ្នូរនៅសល់ ១០១នាក់នោះឡើយ ហើយក៏មិនបានរួមចំណែកដល់អនាគតប្រកបដោយសន្តិភាពដែលយើងប្រាថ្នា និងអធិដ្ឋានឲ្យមានដល់ប្រជាជនទាំងអស់ នៅក្នុងតំបន់ និងអ្វីផ្សេងលើសពីនេះទៀតដែរ»។

គួរបញ្ជាក់ថា កាលពីថ្ងៃចន្ទ (ទី២ ខែកញ្ញា) រដ្ឋមន្ត្រីការបរទេសអង់គ្លេសលោក David Lammy បាននិយាយថា រដ្ឋាភិបាលបានព្យួរអាជ្ញាប័ណ្ណនាំចេញអាវុធចំនួន ៣០ ក្នុងចំណោម ៣៥០អាជ្ញាប័ណ្ណរបស់អង់គ្លេសជាមួយអ៊ីស្រាអែល ដោយសារហានិភ័យ ដែលគ្រឿងយុទ្ធោបករណ៍ទាំងនេះអាចត្រូវបានយកទៅប្រើប្រាស់ ដើម្បីប្រព្រឹត្តការរំលោភបំពានធ្ងន់ធ្ងរលើច្បាប់មនុស្សធម៌អន្តរជាតិ៕