ប្រទេសឥណ្ឌា នៅថ្ងៃអង្គារ (ទី៣ ខែកញ្ញា) នេះ បានដាក់ពង្រាយនាវាចំនួន ៤គ្រឿង និងយន្តហោះចំនួន ២គ្រឿង ដើម្បីតាមស្វែងរកសមាជិកឆ្មាំល្បាតសមុទ្រចំនួន ៣នាក់ដែលបាត់ខ្លួន បន្ទាប់ពីឧទ្ធម្ភាគចក្ររបស់ពួកគេ បានធ្លាក់ចូលទៅក្នុងសមុទ្រអារ៉ាប់ អំឡុងពេលប្រតិបត្តិការជួយសង្គ្រោះ។

គួរបញ្ជាក់ថា ឧទ្ធម្ភាគចក្រឆ្មាំល្បាតឆ្នេរ កំពុងព្យាយាមជួយសង្គ្រោះសមាជិកនាវិក ដែលរងរបួសនៅលើនាវាដឹកប្រេងមានទង់ជាតិឥណ្ឌា នៅចម្ងាយប្រហែល ៤៥គីឡូម៉ែត្រពីឆ្នេរសមុទ្រនៃរដ្ឋ Gujarat ភាគខាងលិចរបស់ប្រទេសឥណ្ឌា កាលពីល្ងាចថ្ងៃចន្ទ (ទី២ ខែកញ្ញា)។

ឆ្មាំសមុទ្រឥណ្ឌា បានឲ្យដឹងនៅក្នុងសេចក្តីថ្លែងការណ៍ថា៖ «ឧទ្ធម្ភាគចក្រចុះចតជាបន្ទាន់យ៉ាងពិបាក ហើយបានធ្លាក់ចូលទៅក្នុងសមុទ្រ។ សមាជិកនាវិកម្នាក់ត្រូវបានទាញឡើងមកវិញ ខណៈការស្វែងរកសមាជិកនាវិក ៣នាក់ទៀត កំពុងដំណើរការ»។ សេចក្ដីថ្លែងការណ៍បានបន្ថែមថា បំណែកនៃឧទ្ធម្ភាគចក្រត្រូវបានរកឃើញ។ 

គួរដឹងដែរថា នាវិកឧទ្ធម្ភាគចក្រនាពេលថ្មីៗនេះ ត្រូវបានដាក់ពង្រាយនៅលើគោក ដើម្បីជួយសង្គ្រោះមនុស្សរាប់សិបនាក់ ដែលជាប់មិនអាចទៅណារួច កាលពីចុងខែសីហា បន្ទាប់ពីទឹកជំនន់ដ៏ធំ ដោយសារភ្លៀងមូសុង បានកើតមាននៅទូទាំងតំបន់ដ៏ធំនៃរដ្ឋ Gujarat ដោយបានសម្លាប់មនុស្សយ៉ាងហោចណាស់ ២៨នាក់៕