ចំនួនអ្នកស្លាប់ដោយសារទឹកជំនន់ នៅក្នុងប្រទេសបង់ក្លាដែស បានកើនឡើងដល់ ៧១នាក់ហើយ គិតត្រឹមថ្ងៃអង្គារ (ទី៣ ខែកញ្ញា) នេះ ដោយមនុស្សរាប់លាននាក់នៅតែជាប់ទៅណាមិនរួច នៅក្នុងតំបន់ជាច្រើនដែលរងការបំផ្លិចបំផ្លាញ ស្របពេលក្ដីបារម្ភមានកាន់តែខ្លាំងឡើង អំពីការផ្ទុះឡើងនូវជំងឺឆ្លងទឹក នៅពេលដែលទឹកជំនន់ស្រក។

គួរបញ្ជាក់ថា ទឹកជំនន់ដែលបង្កឡើងដោយភ្លៀងខ្យល់មូសុងធ្លាក់បន្តឥតឈប់ឈរ និងការហូរពីផ្លូវទឹកខ្សែទឹកខាងលើ បានបង្កជាការខូចខាតយ៉ាងធ្ងន់ធ្ងរ ក្នុងរយៈពេល ២សប្តាហ៍កន្លងមកនេះ ដែលបណ្តាលឲ្យមានការបំផ្លិចបំផ្លាញគ្រប់ទីកន្លែង និងប៉ះពាល់ដល់ប្រជាជនប្រហែល ៥នាក់។

ប្រជាពលរដ្ឋជាង ៥៨០.០០០គ្រួសារ នៅតែជាប់ខ្លួននៅនឹងកន្លែងមិនអាចចេញទៅណារួច នៅក្នុងតំបន់ចំនួន ១១ ដែលរងគ្រោះដោយទឹកជំនន់ ហើយត្រូវការជាបន្ទាន់នូវអាហារ ទឹកស្អាត ថ្នាំពេទ្យ និងសម្លៀកបំពាក់ស្ងួត។ ក្រុមគ្រូពេទ្យជិត ៥០០នាក់ កំពុងជួយផ្តល់ការព្យាបាល ដោយមានកងទ័ព ទ័ពអាកាស កងទ័ពជើងទឹក និងឆ្មាំព្រំដែនបានជួយដល់កិច្ចខិតខំប្រឹងប្រែងសង្គ្រោះនេះ។

ហើយឥឡូវនេះ អាជ្ញាធរកំពុងផ្តោតលើការទប់ស្កាត់នូវការរីករាលដាលនៃជំងឺឆ្លងតាមទឹក ដែលជាផលវិបាកទូទៅពីការមានគ្រោះមហន្តរាយបែបនេះ និងការធានាឲ្យមានការផ្គត់ផ្គង់ទឹកស្អាត៕