រដ្ឋមួយនៅក្នុងប្រទេសឥណ្ឌា ដែលរួមរឹតដោយការតវ៉ាទាមទារយុត្តិធម៌ជាច្រើនសប្តាហ៍បន្ទាប់ពីហេតុការណ៍រំលោភសម្លាប់វេជ្ជបណ្ឌិតស្រ្តីម្នាក់ បានអនុម័តច្បាប់មួយនៅថ្ងៃអង្គារ (០៣ កញ្ញា) ដែលអាចឈានដល់ការប្រហារជីវិតជនល្មើសរំលោភសេពសន្ថវៈ។

ការតវ៉ាដ៏កក្រើកនោះបានផ្ទុះឡើងនៅក្នុងរដ្ឋ វេស បេនហ្កាល់ (West Bengal) បន្ទាប់ពីការរកឃើញសាកសពរបស់គ្រូពេទ្យស្រ្តីវ័យ ៣១ឆ្នាំម្នាក់ នៅមន្ទីរពេទ្យរដ្ឋក្នុងទីក្រុង កុលកាតា (Kolkata) កាលពីថ្ងៃទី០៩ ខែសីហា។

ច្បាប់ដែលបានអនុម័តដោយសភារបស់រដ្ឋប៉ុន្តែនៅមិនទាន់ត្រូវបានអនុម័តដោយប្រធានាធិបតីនេះ បង្ហាញការខឹងសម្បារចំពោះបញ្ហាដ៏រ៉ាំរ៉ៃនៃអំពើហិង្សាលើស្ត្រី។ ច្បាប់ថ្មីរបស់រដ្ឋ West Bengal ភាគច្រើនគ្រាន់តែជានិមិត្តរូបប៉ុណ្ណោះព្រោះក្រមព្រហ្មទណ្ឌរបស់ឥណ្ឌាអនុវត្តស្របគ្នានៅទូទាំងប្រទេស ប៉ុន្តែការអនុម័តពីប្រធានាធិបតីអាចធ្វើឱ្យមានករណីលើកលែង ហើយធ្វើឱ្យវាក្លាយជាច្បាប់សម្រាប់រដ្ឋ។

ច្បាប់នេះបានបង្កើនទោសលើករណីរំលោភសេពសន្ថវៈពីការកាត់ទោសបច្ចុប្បន្នដែលមានរយៈពេលយ៉ាងហោចណាស់ ១០ឆ្នាំ ទៅដល់ការដាក់ពន្ធនាគារអស់មួយជីវិត ឬប្រហារជីវិត។ ករណីឃាតកម្មរបស់គ្រូពេទ្យនេះបានបង្កឱ្យមានការតវ៉ាដោយក្រុមគ្រូពេទ្យ និងការបន្តប្រមូលផ្តុំដែលគាំទ្រដោយពលរដ្ឋសាមញ្ញរាប់ម៉ឺននាក់នៅទូទាំងឥណ្ឌា ទោះបីជាវេជ្ជបណ្ឌិតជាច្រើនបានត្រឡប់ទៅធ្វើការវិញក៏ដោយ។

ហេតុការណ៍នេះបានបង្កឱ្យមានការប្រៀបធៀបជាមួយនឹងការរំលោភបូក និងឃាតកម្មដ៏រន្ធត់កាលពីឆ្នាំ២០១២ ទៅលើនារីវ័យក្មេងម្នាក់នៅលើរថយន្តក្រុងក្នុងរដ្ឋធានីញូវដេលី។ ទោសប្រហារជីវិតនៅឥណ្ឌា ជារឿយៗត្រូវបានជាប់គាំងដោយការប្តឹងឧទ្ធរណ៍ជាច្រើនឆ្នាំ ហើយការប្រហារជីវិតជាធម្មតាត្រូវបានអនុវត្តដោយការព្យួរក (ចង-ក)៕