អាហ្វហ្គានីស្ថាន៖ រដ្ឋាភិបាលក្រុងបណ្តោះអាសន្ននៃរដ្ឋធានីអាហ្វហ្គានីស្ថានបាននិយាយកាលពីថ្ងៃអាទិត្យថា បុគ្គលិកជាស្ត្រីនៅក្នុងរដ្ឋាភិបាលទីក្រុងកាប៊ុលត្រូវបានគេប្រាប់ឱ្យស្នាក់នៅផ្ទះ ដោយអនុញ្ញាតឱ្យធ្វើការងារណាដែលបុរសមិនអាចជំនួសបានតែប៉ុណ្ណោះ ជាការរឹតត្បិតលើសិទ្ធិសេរីភាពថ្មីលើស្ត្រីពីសំណាក់ក្រុមមេដឹកនាំតាលីបង់ថ្មី។
លោក Hamdullah Namony បាននិយាយថា មុនពេលក្រុមតាលីបង់ចូលកាន់កាប់កាលពីខែមុន មានត្រឹមតែមួយភាគបីនៃបុគ្គលិកទីក្រុងជិត ៣.០០០នាក់ជាស្ត្រី ហើយពួកគេបានធ្វើការនៅគ្រប់នាយកដ្ឋានទាំងអស់។ ស្ត្រីរាប់សិបនាក់បានចេញតវ៉ានៅក្នុងទីក្រុងកាប៊ុលកាលពីថ្ងៃអាទិត្យ កាន់ស្លាកផ្សេងៗអំពាវនាវឱ្យមានការចូលរួមពីស្ត្រីនៅក្នុងជីវិតសាធារណៈ។ ការតវ៉ានេះបានកើតឡើង នៅពេលដែលបុគ្គលិករដ្ឋាភិបាលជាស្ត្រីនៅទីក្រុងកាប៊ុលត្រូវបានគេប្រាប់ឱ្យស្នាក់នៅផ្ទះ ដោយអនុញ្ញាតឱ្យធ្វើការងារណាដែលបុរសមិនអាចជំនួសបាន។
ការសម្រេចចិត្តរារាំងបុគ្គលិកទីក្រុងជាស្ត្រី ភាគច្រើនមិនឱ្យវិលត្រឡប់មកធ្វើការងារវិញគឺជាសញ្ញាមួយទៀតដែលថា ពួកតាលីបង់ដែលបានវាយលុកដណ្ដើមគ្រប់គ្រងទីក្រុងកាប៊ុលកាលពីខែមុន កំពុងអនុវត្តន៍យ៉ាងតឹងរ៉ឹងតាមសាសនាអ៊ីស្លាមរបស់ពួកគេ ទោះជាមេដឹកនាំមួយចំនួនដំបូងឡើយបានសន្យាថា ពួកគេនឹងអត់ឱន និងអនុញ្ញាតឲ្យមានការលាយបញ្ចូលគ្នាជាមួយបុរស និងស្ត្រីក៏ដោយ។ កាលពីក្នុងរបបដឹកនាំមុនរបស់ពួកគេក្នុងទស្សវត្សរ៍ឆ្នាំ១៩៩០ ពួកតាលីបង់បានរារាំងក្មេងស្រី និងស្ត្រីមិនឱ្យចូលសាលារៀន ធ្វើការងារ និងចូលរួមក្នុងជីវិតសាធារណៈឡើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
