បន្ទាប់ពីក្រុមជ្រុលនិយមមួយក្តាប់តូច បាននិងកំពុងបំភ្លៃខុសការពិត ដោយយក Google Maps ធ្វើជាផែនទីព្រំដែននៃប្រទេសកម្ពុជានោះ បញ្ញវន្តនៅក្នុងប្រទេសកម្ពុជា បានអំពាវនាវដល់ប្រជាពលរដ្ឋកុំជឿតាមការបំផុសបំផុលរបស់ក្រុមជ្រុលនិយមទាំងអស់នេះ។
មានប្រសាសន៍ប្រាប់BTV នៅថ្ងៃទី០៤ ខែកញ្ញានេះ បញ្ញវន្តរស់នៅក្នុងរាជធានីភ្នំពេញ បានយល់ឃើញថា ការយក Google Maps របស់ក្រុមជ្រុលនិយមមួយក្តាប់តូចរស់នៅបរទេស មកវាស់វែងធ្វើជាព្រំដែននៃប្រទេសកម្ពុជានោះ គឺមិនសមទំនងទាល់តែសោះ ទាំងបច្ចេកទេស និងផ្លូវច្បាប់ ព្រោះថាប្រទេសកម្ពុជាមានលេខាធិការដ្ឋានកិច្ចការព្រំដែនមួយ ដែលអាចដោះស្រាយបញ្ហាព្រំដែនបាន និងម្យ៉ាងវិញទៀតប្រទេសកម្ពុជាបានកំណត់យកផែនទីខ្នាតមួយលើមួយរយពាន់សម្រាប់ប្រើប្រាស់ផែនទីកំណត់ព្រំដែននៅក្នុងប្រទេសកម្ពុជា និងប្រទេសជិតខាង។ បន្ថែមលើនេះ បញ្ញវន្តក៏បានអំពាវនាវដល់ប្រជាពលរដ្ឋកុំជឿតាមការបំផុសបំផុលរបស់ក្រុមជ្រុលនិយមទាំងអស់នេះ ដែលនាំឱ្យពលរដ្ឋខ្មែរបែកបាក់សាមគ្គីភាព ។
តាមរយៈកិច្ចសម្ភាសជាមួយទូរទស្សន៍ជាតិកម្ពុជា នាពេលថ្មីៗនេះ ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន មានប្រសាសន៍ថា ប្រទេកម្ពុជា មិនឱ្យមានការបាត់បង់ទឹកដីសូម្បី១មីលីម៉ែត្រឡើយ ហើយក៏មិនចង់បានដីនរណាសូម្បី១មីលីម៉ែត្រដូចគ្នា។ ការបញ្ជាក់យ៉ាងដូច្នេះ ធ្វើឡើងបន្ទាប់ពីក្រុមជ្រុលនិយមមួយក្តាប់តូច បាននិងកំពុងបំភ្លៃខុសពីការពិត ដោយយក Google Maps ធ្វើជាផែនទីព្រំដែននៃប្រទេសកម្ពុជា។
នៅក្នុងកិច្ចសម្ភាស ឯកឧត្តមបានបញ្ជាក់ថា នរណាក៏មានគំនិតស្នេហាជាតិ ស្រលាញ់ទឹកដីដូចគ្នា តែកុំជឿបុគ្គលដូច សម រង្ស៉ី ដែលមានគំនិតទុច្ចរិត តែងតែបង្កចលាចល ឱ្យមានភាពវឹកវររហូតមក។
សម្រាប់កិច្ចការងារបោះបង្គោលព្រំដែន បានចំណាយពេលរាប់ឆ្នាំ នៅក្នុងការចរចា កំណត់និយាមការ ជជែកគ្នា ទាំងនៅលើផែនទី និងនៅលើដីជាក់ស្តែង ហើយមានចំណុចនិយាមការ ជាង ៣០០០ រវាងកម្ពុជា និងវៀតណាម នៅលើខ្សែព្រំដែន ប្រមាណ ១២៧០គីឡូម៉ែត្រនេះ។ ក្នុងចំណោមប្រវែងនេះ ភាគីទាំងពីរបោះបង្គោលសម្រេចបាន ៨៤ភាគរយ ទាំងខ្សែឯកភាពគ្នានៅលើព្រំដែន និងទាំងការបោះបង្គោល ហើយបានបោះបង្គោលចំនួន ២០៤៧បង្គោល ចែកចេញជា៣ប្រភេទសំខាន់ គឺបង្គោលមេ, បង្គោលបំពេញបំពេញបន្ថែម និងបង្គោលតម្រុយព្រំដែន។
គួរបញ្ជាក់ដែរថា ការងារបោះបង្គោលព្រំដែន គឺផ្អែកលើគោលការណ៍ធំចំនួន៣ ដែលក្នុងនោះរួមមាន៖ទី១.ផ្អែកទៅលើផែនទីដែលបន្សល់ទុកពីអាណានិគមនិយមបារាំង ដែលជាផែនទីគោលយកជាមូលដ្ឋាន គឺជាផែនទីដែលត្រូវកំណត់ថា មរតកខ្សែព្រំដែនមិនកែប្រែ ទី២៖ផ្អែកទៅលើគោលការណ៍ច្បាប់អនុ្តរជាតិនិងឧត្តមមានុវត្តន៍អន្តរជាតិ និងទី៣.ផ្អែកទៅលើការកាន់កាប់រស់នៅជាច្រើនជំនាន់របស់ប្រជាពលរដ្ឋ៕ អត្ថបទ៖ សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
