ទីភ្នាក់ងារសង្គ្រោះរបស់អង្គការសហប្រជាជាតិ បាននិយាយកាលពីថ្ងៃអង្គារថា ករណីជំងឺអុតស្វា(mpox) ប្រហែល៣៦៧ករណី រួមទាំងអ្នកស្លាប់៣នាក់ រហូតមកដល់ពេលនេះ ត្រូវបានបញ្ជាក់នៅក្នុងប្រទេសចំនួន៥នៅអាហ្វ្រិកខាងកើតនិងខាងត្បូង ក្នុងពេលមានការព្រួយបារម្ភថា ចំនួននេះអាចកើនឡើងបន្ថែមទៀត។

ការិយាល័យសម្របសម្រួលកិច្ចការមនុស្សធម៌អង្គការសហប្រជាជាតិ (OCHA) បាននិយាយថា គិតត្រឹមថ្ងៃច័ន្ទ ប្រទេសប៊ូរុនឌី បានកត់ត្រាករណីចំនួន ៣២៨ករណី អាហ្វ្រិកខាងត្បូង២៤ករណី អ៊ុយហ្គង់ដា៧ករណី ខណៈប្រទេសរ៉្វាន់ដា និងកេនយ៉ា មាន ៤ ករណី រៀងៗខ្លួន។

ការិយាល័យប្រចាំតំបន់របស់អង្គការ OCHA ទទួលបន្ទុកនៅអាហ្វ្រិកខាងត្បូង និងអាហ្វ្រិកភាគខាងកើត នៅក្នុងការធ្វើបច្ចុប្បន្នភាពចុងក្រោយស្តីពីជំងឺនេះ បាននិយាយថា ប្រទេសមួយចំនួនក្នុងតំបន់បានចាប់ផ្តើមផែនការឆ្លើយតបរបស់ពួកគេ រួមទាំងប្រទេសប៊ូរុនឌី រ៉្វាន់ដា និងអ៊ុយហ្គង់ដា ដើម្បីគ្រប់គ្រងជំងឺ។ ទោះជាយ៉ាងណា មូលនិធិ និងធនធានមានកំណត់ រារាំងដល់កិច្ចខិតខំប្រឹងប្រែងដើម្បីទប់ស្កាត់ការរាលដាលបន្ថែមទៀត។

យោងតាមទីភ្នាក់ងារអង្គការសហប្រជាជាតិបានឲ្យដឹងថា ករណីដែលបានបញ្ជាក់ជាង៣.៨០០ករណី ត្រូវបានកត់ត្រានៅទូទាំងទ្វីបអាហ្រ្វិក ចាប់តាំងពីខែមករា ដោយប្រទេសប៊ូរុនឌី ជាប្រទេសដែលរងផលប៉ះពាល់ខ្លាំងបំផុតទីពីរ នៅក្នុងទ្វីបបន្ទាប់ពីសាធារណរដ្ឋប្រជាធិបតេយ្យកុងហ្គោ (DRC)។

អង្គការសុខភាពពិភពលោក (WHO) បានប្រកាសជំងឺនេះថាជាគ្រាអាសន្នសុខភាពសាធារណៈនៃការព្រួយបារម្ភអន្តរជាតិ ហើយបានអំពាវនាវឱ្យមានការឆ្លើយតបជាអន្តរជាតិ ដើម្បីបញ្ឈប់ការផ្ទុះឡើងជំងឺអុតស្វា(mpox) និងជួយសង្គ្រោះជីវិតមនុស្ស។ ចំណាត់ការរបស់ទីភ្នាក់ងារសុខភាពអង្គការសហប្រជាជាតិ បានធ្វើឡើងបន្ទាប់ពីមានការផ្ទុះឡើងនៃការឆ្លងវីរុសនៅប្រទេសកុងហ្គោ និងការរាលដាលចូលទៅកាន់ប្រទេសជិតខាងខ្លួន នៅក្នុងទ្វីបអាហ្រ្វិក។