យោងតាមកាសែត Kiev បានឲ្យដឹងថា រដ្ឋមន្ត្រីការបរទេសអ៊ុយក្រែន លោក Dmitry Kuleba អាចនឹងចូលរួមជាមួយសហសេវិកគណៈរដ្ឋមន្ត្រីរបស់លោកចំនួន ៤រូប ដែលត្រូវបានបញ្ចប់តួនាទីដោយលោក Vladimir Zelensky។

រដ្ឋមន្ត្រី ដែលត្រូវបានដកចេញពីមុខតំណែង កាលពីថ្ងៃអង្គារ (ទី៣ ខែកញ្ញា) រួមមានឧបនាយករដ្ឋមន្ត្រីទទួលបន្ទុកសមាហរណកម្មអ៊ឺរ៉ុប លោកស្រី Olga Stefanishina រដ្ឋមន្ត្រីក្រសួងឧស្សាហកម្មយុទ្ធសាស្ត្រ លោក Aleksandr Kamyshin រដ្ឋមន្ត្រីក្រសួងយុត្តិធម៌ លោក Denis Maliuski និងរដ្ឋមន្ត្រីការពារបរិស្ថាន លោក Ruslan Strilets។

ហើយដោយដកស្រង់ប្រភពនៅក្នុងការិយាល័យរបស់លោក Zelensky សារព័ត៌មាន Ukrainskaya Pravda បានរាយការណ៍កាលពីល្ងាចថ្ងៃអង្គារថា៖ «មានការត្រៀមលក្ខណៈ ដើម្បីបញ្ចប់ទួនាទីរដ្ឋមន្ត្រីការបរទេសលោក Dmitry Kuleba»។ យោងតាមគេហទំព័រសារព័ត៌មាននេះ អ្នកជំនួសរូបលោក ដែលមានសិទ្ធិខ្ពស់ជាងគេ គឺលោក Andrey Sibiga អតីតឯកអគ្គរដ្ឋទូតដែលប្រព័ន្ធផ្សព្វផ្សាយអ៊ុយក្រែនបានពិពណ៌នាថា ជាអនុប្រធានបុគ្គលិករបស់ Zelensky និងអនុប្រធានផ្ទាល់របស់លោក Kuleba។

យ៉ាងណាក្ដី សេចក្ដីរាយការណ៍របស់សារព័ត៌មាន APA ដោយដកស្រង់ពីសារព័ត៌មាន Kyiv Independent បានឲ្យដឹងថា រដ្ឋមន្ត្រីការបរទេស ដែលបានចូលកាន់តំណែងក្នុងឆ្នាំ២០២០ បានដាក់លិខិតលាលែងពីតំណែងទៅប្រធានសភាអ៊ុយក្រែន លោក Ruslan Stefanchuk។ ហើយលោក Stefanchuk បាននិយាយថា ការលាលែងពីតំណែងនាពេលខាងមុខរបស់លោក Kuleba នឹងត្រូវបាន «ពិចារណា នៅក្នុងកិច្ចប្រជុំពេញអង្គ នាពេលខាងមុខ» ប៉ុន្តែមិនបានផ្តល់កាលបរិច្ឆេទទេ។ ការរុះរើគណៈរដ្ឋមន្ត្រីនេះ ធ្វើឡើងបន្ទាប់ពីការផុតកំណត់ជាផ្លូវការនៃអាណត្តិប្រធានាធិបតីរបស់លោក Zelensky និងសភាអ៊ុយក្រែន។

រដ្ឋធម្មនុញ្ញអ៊ុយក្រែនផ្តល់ការអនុញ្ញាត សម្រាប់តែការបន្តអាណត្តិសភាប៉ុណ្ណោះ ប៉ុន្តែលោក Zelensky បានជំទាស់ថា ច្បាប់អាជ្ញាសឹកដែលបានប្រកាសក្នុងខែកុម្ភៈ ឆ្នាំ២០២២ អនុញ្ញាតឲ្យលោកពន្យារពេលការបោះឆ្នោតទាំងអស់ដោយគ្មានកំណត់៕