រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក បេហ្សាឡែល ស្មូតរិច (Bezalel Smotrich) កាលពីថ្ងៃអង្គារ បានបង្ហាញផែនការថវិកាឆ្នាំ ២០២៥ របស់រដ្ឋាភិបាល ដោយបានរៀបរាប់លម្អិតអំពីការកាត់បន្ថយការចំណាយយ៉ាងច្រើន ខណៈដែលអ៊ីស្រាអែល ប្រឈមនឹងការចំណាយដែលទាក់ទងនឹងសង្គ្រាមនៅតំបន់ហ្កាហ្សា កាន់តែធ្ងន់ធ្ងរឡើង។

ផែនការដែលត្រូវបានរំពឹងថា នឹងទទួលបានការអនុម័ត នៅចុងឆ្នាំនេះ មានគោលបំណងកាត់បន្ថយឱនភាពមកត្រឹម ៤ភាគរយនៃផលិតផលក្នុងស្រុកសរុប (GDP) នៅឆ្នាំ ២០២៥ ធ្លាក់ចុះពី ៦,៦ ភាគរយក្នុងឆ្នាំ ២០២៤ ។ ឱនភាពរបស់អ៊ីស្រាអែល បានកើនឡើងដល់ ៨,១ ភាគរយនៃផលិតផលក្នុងស្រុកសរុបសម្រាប់ រយៈពេល ១២ ខែ ចាប់ពីខែសីហា ឆ្នាំ ២០២៣ ដល់ខែកក្កដា ឆ្នាំ ២០២៤ ដែលត្រូវបានជំរុញដោយការចំណាយដ៏ច្រើនពីប្រតិបត្តិការយោធា ដែលកំពុងបន្តនៅក្នុងតំបន់ហ្កាហ្សា ដែលបានចាប់ផ្តើម កាលពីខែតុលា ឆ្នាំមុន។

លោក ស្មូតរិច បានកត់សម្គាល់ថា ជម្លោះជិតដល់ខែទី១១ របស់ខ្លួន បានធ្វើឲ្យអ៊ីស្រាអែលខាតបង់ប្រាក់ដែលតាមការប៉ាន់ស្មានពី ២០០-២៥០ ពាន់លានសេកែល (ប្រហែល ៥៤-៦៨ពាន់លានដុល្លារ) ដោយធ្វើឲ្យវាក្លាយជាសង្រ្គាមដ៏យូរបំផុត និងចំណាយច្រើនបំផុត ក្នុងប្រវត្តិសាស្ត្រអ៊ីស្រាអែល»។