មន្ត្រីអាមេរិកម្នាក់ បានប្រាប់សារព័ត៌មាន Reuters សហរដ្ឋអាមេរិក នឹងបញ្ជូនលោក Michael Chase ដែលជាឧបការីក្រសួងការពារជាតិទទួលបន្ទុកកិច្ចការប្រទេសចិន កោះតៃវ៉ាន់ និងម៉ុងហ្គោលី ទៅកាន់វេទិកាសន្តិសុខកំពូលប្រចាំឆ្នាំរបស់ទីក្រុងប៉េកាំង នៅពាក់កណ្តាលខែកញ្ញា។

ការជ្រើសរើសលោក Chase មិនត្រូវបានរាយការណ៍ឲ្យដឹងពីមុននោះទេ។ លោកមានឋានៈខ្ពស់ជាងមន្ត្រីអាមេរិក ដែលបានចូលរួមវេទិកាឈ្មោះ Xiangshan ក្នុងឆ្នាំ២០២៣។ នេះគឺជាសញ្ញាមួយដែលបង្ហាញថា យោធាអាមេរិកកំពុងសង្ឃឹមឲ្យមានការចូលរួមកម្រិតការងារកាន់តែស៊ីជម្រៅជាមួយប្រទេសចិន ចំពេលមានជម្លោះ ក្នុងតំបន់ និងការបង្កើននូវការដាក់ពង្រាយកម្លាំងយោធា នៅទូទាំងអាស៊ីបូព៌ា។

ប្រព័ន្ធផ្សព្វផ្សាយរដ្ឋចិន នៅថ្ងៃពុធ (ទី៤ ខែកញ្ញា) នេះ បានរាយការណ៍ថា ប្រទេស និងអង្គការអន្តរជាតិជាង ៩០ គ្រោងនឹងបញ្ជូនគណៈប្រតិភូទៅកាន់វេទិកានេះ ដែលត្រូវចាប់ផ្ដើមពីថ្ងៃទី១២ ដល់ថ្ងៃទី១៤ ខែកញ្ញា នៅទីក្រុងប៉េកាំង។

មន្ត្រីអាមេរិករូបនោះ បានបន្ថែមថា ការចូលរួមរបស់លោក Chase គឺស្របតាមបទដ្ឋានប្រវត្តិសាស្ត្រ គិតចាប់តាំងពីពេលដែលឧបការីក្រសួងការពារជាតិអាមេរិកទទួលបន្ទុកកិច្ចការប្រទេសចិន លោក Chad Sbragia បានចូលរួមវេទិកានេះ ក្នុងឆ្នាំ២០១៩។ មន្ត្រីរូបនេះបាននិយាយក្នុងលក្ខខណ្ឌមិនបញ្ចេញឈ្មោះដោយសារភាពរសើបនៃបញ្ហានេះ៕