នាយករដ្ឋមន្ត្រីថ្មីរបស់ប្រទេសថៃ បានជ្រើសតាំងគណៈរដ្ឋមន្ត្រីរបស់លោកស្រី នៅថ្ងៃពុធ (ទី៤ ខែកញ្ញា) នេះ ដោយបានដកគណបក្សដែលមានទំនាក់ទំនងជាមួយពួកយោធាដ៏មានឥទ្ធិពលពីរដ្ឋាភិបាល ដែលជាលើកដំបូង គិតចាប់តាំងពីឆ្នាំ២០១៩។

ព្រះមហាក្សត្រ Maha Vajiralongkorn បានរាជានុម័តជាផ្លូវការ ចំពោះក្រុមរដ្ឋមន្ត្រីថ្មីដែលត្រូវបានជ្រើសតាំងដោយនាយករដ្ឋមន្ត្រី លោកស្រី Paetongtarn Shinawatra របស់គណបក្សភឿថៃ (Pheu Thai) ហើយលោកស្រីត្រូវបានគេរំពឹងថា នឹងបង្ហាញកម្មវិធីគោលនយោបាយរបស់លោកស្រីទៅកាន់សភា នាសប្តាហ៍ក្រោយ។

រដ្ឋមន្ត្រីជាន់ខ្ពស់ជាច្រើនរូបរបស់លោកស្រី មិនមានការផ្លាស់ប្តូរនោះទេ ប៉ុន្តែបានដកគណបក្សក្នុងរដ្ឋាភិបាលចម្រុះដែលកំពុងកាន់អំណាច គឺគណបក្ស Palang Pracharath (PPRP) ដែលដឹកនាំដោយអតីតមេទ័ព និងជាអ្នកធ្វើរដ្ឋប្រហារ គឺលោក Prawit Wongsuwan។

គណបក្ស PPRP ត្រូវបានបង្កើតឡើងធ្វើជាមធ្យោបាយ ដើម្បីឲ្យមេដឹកនាំរបបយោធាបន្តរក្សាអំណាច ក្នុងទម្រង់ស៊ីវិល នៅក្នុងការបោះឆ្នោតឆ្នាំ២០១៩ ហើយបានដឹកនាំរដ្ឋាភិបាល រហូតដល់ការបោះឆ្នោត កាលពីឆ្នាំមុន ដែលនាំឲ្យគណបក្សភឿថៃឡើងកាន់អំណាច។

តែយ៉ាងណាក្ដី គណបក្សភឿថៃបានធ្វើឲ្យមានការភ្ញាក់ផ្អើល និងការស្រងាកចិត្ត ក្នុងចំណោមអ្នកគាំទ្រមួយចំនួន នៅពេលដែលខ្លួនបានបញ្ចូលបន្ថែមគណបក្ស PPRP ទៅក្នុងរដ្ឋាភិបាលចម្រុះរបស់ខ្លួន កាលពីខែសីហាឆ្នាំមុន៕