បេសកកម្មរបស់មូលនិធិរូបិយវត្ថុអន្តរជាតិ (IMF) នៅថ្ងៃពុធ (ទី៤ ខែកញ្ញា) បានចាប់ផ្តើមដំណើរការវាយតម្លៃលើកទី៥ នៃកម្មវិធីផ្តល់ប្រាក់កម្ចីចំនួន ១៥,៦ពាន់លានដុល្លាររបស់ខ្លួនដល់ប្រទេសអ៊ុយក្រែន ចំពេលមានការរុះរើរដ្ឋាភិបាលក្នុងសម័យសង្រ្គាមដ៏ធំមួយ។

IMF គឺជាអ្នកផ្តល់ប្រាក់កម្ចីអន្តរជាតិដ៏ធំដល់ទីក្រុងគីវ ហើយកម្មវិធីរយៈពេល ៤ឆ្នាំរបស់ស្ថាប័ននេះ គឺជាផ្នែកដ៏មានសារៈសំខាន់នៃកញ្ចប់ជំនួយសេដ្ឋកិច្ចសកលកាន់តែធំ សម្រាប់ប្រទេសនេះដែលកំពុងត្រៀមខ្លួនសម្រាប់រដូវរងាលើកទី៣ ក្នុងការប្រឹងប្រែងទប់ទល់នឹងការលុកលុយពេញលេញរបស់រុស្ស៊ី។

ទីក្រុងគីវ កំពុងចំណាយប្រហែល ៦០ភាគរយនៃថវិកាសរុបរបស់ខ្លួន ដើម្បីផ្តល់មូលនិធិដល់កងទ័ពរបស់ខ្លួន និងពឹងផ្អែកយ៉ាងខ្លាំងលើការគាំទ្រផ្នែកហិរញ្ញវត្ថុពីដៃគូលោកខាងលិច ដើម្បីផ្តល់ប្រាក់សោធននិវត្តន៍ និងប្រាក់ឈ្នួលដល់បុគ្គលិកផ្នែកសាធារណៈ ហើយនិងដើម្បីផ្ដល់ហិរញ្ញវត្ថុដល់ការចំណាយផ្នែកសង្គម និងមនុស្សធម៌។

សេចក្តីថ្លែងការណ៍របស់ IMF បានឲ្យដឹងថា បេសកកម្មត្រួតពិនិត្យមូលនិធិ បានចាប់ផ្តើមការពិភាក្សាគោលនយោបាយជាមួយអាជ្ញាធរអ៊ុយក្រែន។

ការវាយតម្លៃនេះ កើតមានឡើងក្នុងពេលដែលប្រធានាធិបតី លោក Volodymyr Zelenskiy កំពុងរុះរើរដ្ឋាភិបាលរបស់ខ្លួន ដើម្បីកំណត់ក្រុមឡើងវិញ នៅមុនរដូវស្លឹកឈើជ្រុះ និងរដូវរងាដ៏សំខាន់ ហើយមកទល់ពេលនេះ រដ្ឋមន្ត្រី ៦នាក់រូបហើយ បានដាក់លិខិតលាលែងពីតំណែង។ តែយ៉ាងណាក្ដី ក្រុមអ្នកវិភាគ និងសមាជិកសភា បាននិយាយថា រដ្ឋមន្ត្រីហិរញ្ញវត្ថុ លោក Serhiy Marchenko ត្រូវបានគេរំពឹងថា នឹងរក្សាតំណែងរបស់លោកដដែល៕